وه‌زیری ته‌ندرووستی حكومه‌تی هه‌رێمی كوردستان، سامان به‌رزنجی رایگه‌یاند، هیچ پابەندبوونێکی بڕیارەکان پەیڕەو ناکرێت و رێژه‌ی تووشبوون به‌ كۆرۆنا گه‌یشتووه‌ته‌ (%10.3) له‌ كاتێكدا پێویسته‌ رێژه‌كه‌ (%5) زیاتر نه‌بێت.

سامان به‌رزنجی راشیگه‌یاند، به‌ گوێره‌ی ئاماری ئه‌مڕۆ، رێژه‌ی تووشبوون دوو ئه‌وه‌نده‌ی رێژەی سنوورداری تووشبوونە، کە پێویستە لە (%5) زیاتر نەبێت.

هه‌روه‌ها نووسیویه‌تی: "ئەم رێژەیە پێشبینی دەکرێت زۆر زیاتریش بێت بەهۆی ئەوەی لەو رۆژانە پشووە زۆربەی تاقیگە و کلینیکە تایبەتەکان نیە، بەڵکو تەنیا فریاکەوتن و سەنتەرەکانی کۆرۆنا هەیە".

له‌ به‌شێكی دیكه‌ی په‌یامه‌كه‌یدا، وه‌زیری ته‌ندروستی نیگه‌رانی ده‌ربڕیوه‌ و نووسیویه‌تی: "نیگەرانین بەوەی هیچ پابەندبوونێکی بڕیارەکان پەیڕەو ناکرێت بەداخەوە بەبێ ماسک و قەرەباڵغی و بەریەککەوتن مایەی خێراتری بڵاوبوونەوەی ڤایرۆسەکە دەبێت لە رۆژانی داهاتوو".

ئه‌م په‌یامه‌ی وه‌زیری ته‌ندروستی دوای ئه‌وه‌ دێت، له‌ شه‌و و رۆژی رابردوودا چوار هاووڵاتی دیكه‌ به‌ كۆرۆنا گیانیان له‌ده‌ستدا و له‌ كۆی (3975) پشكنینی نوێ، ده‌ركه‌وت (411) كه‌سی دیكه‌ تووشی كۆرۆنا بوون.
k24 -