باڵوێزى ژاپۆن لە عێراق میدالیاى زێرینى هەڵاتنى خۆرى پێشکەش بە جێگرى پێشووی سەرۆکى شارەوانى هەڵەبجە کرد، بۆ هەوڵ و ماندووبوونى لە بوارى ئاشتى.

ئەمڕۆ چوارشەممە ١٨ی٣ی٢٠٢١، سوزوکى کۆتارۆ، باڵوێزی ژاپۆن لە عێراق خەڵاتى میدالیاى زێرینى هەڵاتنى خۆرى پێشکەش بە خدر کریم، جێگرى پێشووی سەرۆکى شارەوانى هەڵەبجە کرد بۆ هەوڵ و ماندووبوونى لە بوارى ئاشتى کە لەلایەن خاوەن شکۆ ئیمپراتۆرى ژاپۆنەوە دەستنیشان کرابوو لە ٢٠٢٠.

خەڵاتى ناوبراو پێشکەش بە خدر کریم کرا و سوپاس و پێزانینى کرا لە برى هەوڵ و ماندووبوونى لە برەودان بە پەیوەندییە دۆستایەتى دوو لایەنەى نێوان ژاپۆن و هەرێمى کوردستانى عێراق و پتەوکردنى پەیوەندییەکانى نێوان ژاپۆن و عێراق، بە تایبەتى لە نێوان شارى هەڵەبجە و شارەکانى هیرۆشیما و ناکازاکى ژاپۆنى لە بوارى ئاشتی دا.

لە میانەى مەراسیمى رێزلێنانەکەدا کە لە شارى هەولێر بەرێوەچوو، باڵوێز سوزوکى ئاماژەى بەوەدا، کە خدر کریم نەک تەنها لە بیرو هزرى خەڵکى هیرۆشیما و ناکازاکى دەمێنى، بەڵکو لە بیرو هزرى هەموو خەڵکى ژاپۆن دەمێنێتەوە وەکو باشترین هاورێمان لە عێراق، هەروەها گوتی: "هیواخوازم ئەم چالاکیی و پەیوەندییە دۆستایەتییە لەگەڵ خەڵکى هیرۆشیما و ناکازاکى ببێتە مایەى ئاشتى و سەقامگیرى بۆ هەموو جیهان".












باسنيوز