وەزیری ئەوقاف لەبارەی هێرشە مووشەکییەکانی سەر هەولێر چەند خاڵێکی خستووەتەڕوو، لە یەکێک لە خاڵەکاندا ئاماژە بەوە دەکات کە هەولێر لە پایتەختەکانی ئەمریکا، فەرەنسا و بەریتانیا ئارامترە و دەڵێت، ئەوەی لە پایتەختی ئەو وڵاتانە روودەدات "لە هەولێر نەکراوە"، ئاماژەی بەوەش کردووە "کردەوەیەکی لەم جۆرە لە دونیای ئێستای تیرۆردا بە ئاسایی دەزانرێت".

پشتیوان سادق، وەزیری ئەوقاف لە خاڵی دووەمی پەیامەکەیدا باسی لەوە کردووە "ئەو ھێرشەی دوێنێ لەگەڵ ھێرشە تیرۆریستییەکانی تر جیاوازە، چونکە ھێرشی ئەمجارە بریتییە لە ململانێی نێودەوڵەتی لەنێوان ئەمریکا و ھاوپەیمانان و چەند وڵاتێکی ئیقلیمی بەھێز، بۆیە گواستنەوەی و دروستکردنی کێشە و ئەو ململانێیانە بۆ ھەولێر لەو چواردەورە ئاگرینەدا بێگومان شتێکی مەحاڵ نیە، بەڵکو قابیلی جێبەجێکردنە، ئەوە جیاوازە لە کارەکانی قاعیدە و ئەنسار و داعش".

بە گوتەی وەزیری ئەوقاف، ھەولێر کە بە "شاری ھێمنی" ناسراوە، "سەرەرای ئازارەکەی دوێنێ ئیجابیاتی زۆری ھەیە، بۆ ناو و نێوبانگی کوردستان و پاڵپشتیی زیاتری نێودەوڵەتی بۆ کوردستان و بۆ بەھێزکردنی پێکەوەژیان و پاراستنی ئارامیی زیاتر و پشتگیریی خەڵکەکەی".

لە یەکێکی دیکە لەو خاڵانەی لە پەیامەکەیدا ئاماژەی پێداوە، پشتیوان سادق دەڵێت "خەڵکی ھەولێر ھەر دوێنی تەنانەت یەک خولەکیش لەو شوێنانەی کە مووشەکی بەرکەوتن، دۆخی ژیان نەوەستا و خەڵکەکەی بە ئەوپەڕی مەعنەویاتی بەرزەوە سۆز و خۆشەویستی و وەفایان بۆ شارەکە نیشاندا و، ئەوەش نیشانەی ئازایەتی و زیندوویی و چاونەترسیی خەڵکی بەئەمەکی ھەولێرە، کەواتە ھەولێر ھەر ھەولێرە و گەشاوەتر و زیندووتر دەبێتەوە".

لە کۆتاییدا وەزیری ئەوقاف دەڵێت "مەبەستی سەرەکیی ناحەزان و دووژمنان لەو کارە تیرۆرستییانە بڵاوکردنەوەی ترس و تۆقاندنە، خەڵکی ھەولێر نەترسا".

شەوی دووشەممە 15ی شووباتی 2021 کاژێر 21:30 چەند مووشەکێک لە چەند شوێنێکی جیاوازی هەولێر کەوتنەخوارەوە. یەکێک لە مووشەکەکانیش لە شەقامی 40 مەتری کەوتووەتە خوارەوە. هێرشەکەی سەر هەولێر کاردانەوەی نێوخۆیی و جیهانیی لێکەوتەوە و بە تووندی سەرکۆنە کرا.
rudaw -