مەفرەزەکانی بەشی پۆلیسی نەهێشتنی تاوانی سلێمانی، دوو تۆمەتباریان دەستگیر کرد، کە به‌ فێڵ پارەیان لە هاووڵاتییەک وەرگرتبوو، دواتر هەڵاتبوون.

ئه‌مڕۆ یه‌كشه‌ممه‌ 24/1/2021، به‌ڕێوه‌به‌رایه‌تیی پۆلیسى پارێزگاى سلێمانى، ڕاگه‌یاندراوێكى له‌ په‌یجى فه‌رمیی خۆى، له‌ تۆڕى كۆمه‌ڵایه‌تیی (فه‌یسبووك) بڵاو كرده‌وه‌، تێیدا هاتووه‌: "شەوی 19/1/2021، لە شەقامی بازنەیی مەلیک مەحموود، دوو تۆمەتبار کە ڕێکكەوتبوون لەگەڵ هاووڵاتییەک کەلوپەلی پێ بفرۆشن، دوای ئەوەی دەگەنە لای هاووڵاتییەکە، پارەکەی لێوەردەگرن و پەمپی بیبەر بە دەموچاویدا دەکەن و هەڵدێن".

ئه‌وه‌ش خراوه‌ته‌ ڕوو، دوای ئاگادارکرنەوەی پۆلیس، مەفرەزەکانی بەشی پۆلیسی نەهێشتنی تاوان لێکۆڵینەوەکانیان دەست پێکرد و توانییان هەردوو تۆمەتبارەکە دەستگیر بکەن، هه‌روه‌ها توانییان دەست بەسەر ماتۆرسکیلێکدا بگرن، کە بە تۆمەتباران بووە.

پۆلیسى سلێمانى باسى له‌وه‌ش كردووه‌، ئێستا هەردوو تۆمەتبار (چ. خ. م) لەدایکبووی ساڵى 2000 و (د. ا. خ) لەدایکبووی ساڵى 1998، بە بڕیای دادوەر ڕاگیراون و لێکۆڵینەوە لەگەڵیاندا بەردەوامە.













باسنيوز