وەزیری پلاندانانی حكوومەتی هەرێمی كوردستان رایدەگەینێت، بەهەبوونی بودجە بۆ ساڵی 2021 خزمەتی زیاتری هاووڵاتیان دەكرێت.

بە پێی راگەیاندراوێكی وەزارەتی پلاندانانی حكوومەتی هەرێمی كوردستان، كە، ئاماژە بەوەكراوە، بەگوێرەی خشتەی ڕۆژژمێری بودجەی ساڵی 2021 و ئامادەکارییەکانی هەر دوو وەزارەتی پلاندانان و دارایی، لەسەر ڕاسپاردەی ئەنجوومەنی وەزیران ئەمرۆ دووشەممە 18ی1ی2021، بە سەرپەرشتی دارا ڕەشید، وەزیری پلاندانان كۆبوونەوەی هەر دوو وەزارەتی پلاندانان و دارایی و ئابووری بەرێوەچوو.

ئاماژە بەوەش دراوە، کە لە کۆبوونەوەكەدا بەئامادەبوونی بریکاری وەزارەت و بەرێوەبەری گشتی بودجەکانی وەزارەتی دارایی گفتوگۆ لەبارەی ئامادەکارییەکانی هەر دوو وەزارەت کرا و هەروەها باس لە خشتەی هەماهەنگی لەگەڵ وەزارەتەکان و ئەنجامدانی کۆبوونەوە لەهەفتەی داهاتوو لەگەڵیان کرا، بەمەبەستی دارشتنی کاری هاوبەش و ئامادەکردنی بودجەی ساڵی 2021".

ئەوەش خراوەتە روو، کە وەزیری پلاندانان داوای لێکردوون پەلەبکەن بۆ دانانی میکانیزمەکانی دارشتنی بودجەی بەکاربەر و بودجەی وەبەرهێنان کە هەر دوو وەزارەتی پلاندانان و دارایی بەو ئەرکە هەڵدەستن.

هەروەها وەزیری پلاندانان لە كۆبوونەوەكەدا گوتیشی: "سەرباری ئەوەی ماوەی چەندین ساڵە هەرێمی کوردستان بەبێ بودجەیە، بەڵام بەهەبوونی بودجە بۆ ساڵی 2021 کارئاسانی زۆر دەکات بۆ خەرجی و داهاتەکانی حکوومەت و هەوڵدان بۆ خزمەتکردنی زیاتری هاووڵاتیان".

هەفتەی رابردوو ئەنجوومەنی باڵای ئابووری هەرێمی کوردستان بە سەرپەرشتی مەسرور بارزانی، سەرۆکی حکوومەتی هەرێمی کوردستان کۆبووەوە و لە کۆبوونەوەکەدا گفتوگۆ دەربارەی دیاریکردنی هێڵە گشتییەکانی پڕۆژە یاسای بودجەی ساڵی 2021ی هەرێمی کوردستان کرا.

هەروەها هەر یەک لە وەزیرانی دارایی و پلاندان ڕاپۆرتێکیان دەربارەی دۆخی ئێستای دارایی و ئامادەکارییەکانی پڕۆژە یاسای بودجەی 2021 خستەڕوو.













باسنیوز