رۆژ بۆ رۆژ مه‌ترسییا هه‌رفینا قشلا ئاكرێ نێزیك دبیت، رێڤه‌به‌رێ شینوارێن ئاكرێ ژى ل دور بابه‌تێ ب رێكا (باسنیوز) هه‌وارا خۆ دگه‌هینیت جهێن په‌یوه‌ندیدار تا كۆ د هه‌وارا قشلێ بچن به‌رى كۆ بهه‌رفیت.

هیوا شه‌مال، رێڤه‌به‌رێ شینوارێن قه‌زا ئاكرێ دیار كر: "قشلا ئاكرێ ئێكه‌ ژ ئاڤاهى و شینوارێن زۆر كه‌ڤنار ل قه‌زا ئاكرێ، ل سالا 2010 ئه‌ڤ قشله‌ كه‌فتبو ل ده‌ستێ كۆمپانیه‌كا بیانى ب مه‌ره‌ما نۆژه‌نكرنێ لێ دلگرانى ڤه‌ وێ كۆمپانیێ شاره‌زاى نه‌بویه‌ د بوارێ نۆژه‌نكرنا شینواران و هه‌ر زوى ژلایێ وه‌زاره‌تا باژێرڤانى و گه‌شت و گۆزارێ و رێڤه‌به‌ریا شینواران ، قشله‌ ل ده‌ستێ وێ كۆمپانیێ هات وه‌رگرتن و ل سالا 2013 ئه‌ڤ پرۆژه‌ جاره‌ك دى ژلایێ مه‌ ڤه‌ ده‌ست ب نۆژه‌نكرنا وێ هات كرن و به‌شه‌ك ژ قشلێ هاتیه‌ نۆژه‌نكرن لێ كاودانێن دارایى كارتێكرن ل كارى كریه‌ و نها دا كار ناهێت كرن".

رێڤه‌به‌رێ شۆینه‌وارێن قه‌زا ئاكرێ دیار ژى كر: "مه‌ترسییا هه‌رفینا قشلا ئاكرێ نها دا زۆر هه‌یه‌ چونكه‌ ئاڤاهیه‌ك كه‌ڤنه‌ و ل دیڤ یاسایێن شینواران نابیت قشله‌ بهێت خرابكرن لێ دڤێت نۆژه‌نكرن و دلگرانى ڤه‌ تا نۆكه‌ چ به‌لێنده‌ران خۆ ب نۆژه‌نكرنا وێ نه‌كریه‌ خۆدان و ئه‌گه‌ر قشلە بهێت نۆژه‌نكرن دێ كه‌رتێ ره‌وشه‌نبیرى و گه‌شت و گۆزارا ئاكرێ به‌ره‌ف ده‌وله‌مه‌ندیێ ڤه‌ چیت".

دۆپات ژى كر: "بۆ نۆژه‌نكرنا قشلێ مه‌ نڤیسیارێن فه‌رمى ئاراسته‌ى قایمقامى و پارێزگه‌ها دهۆكێ كرینه‌ و تا وى ئاستى دگه‌ل وه‌زاره‌تا گرێداى ب كارێ مه‌ ڤه‌ دانوستاندن هاتییه‌ كرن و هه‌مان ده‌م دا ده‌مێن بۆرى دا پارێزگارێ دهۆكێ سه‌ره‌دانا قشلا ئاكرێ كریه‌ و سوز دایه‌ دگه‌ل باشبونا ره‌وشێ كارێ نۆژه‌نكرنێ بهێت كرن و ئه‌م چاڤه‌رێ باشبوونا ره‌وشا دارایى دكه‌ین تا كۆ زوترین ده‌م ئه‌ڤ شوینه‌وارێ كه‌ڤن بهێت نۆژه‌نكرن و ژ مه‌ترسیا هه‌رفینێ دویر بكه‌ڤیت، چونكه‌ سالانه‌ بارانێن زۆر ل ئاكرێ دبارن و مەترسی ھەیە ب هه‌رفینا قشلێ كاره‌ساته‌كا مه‌زن په‌یدا بیت".

هه‌ژى دیاكرنێ یه‌، قشلا ئاكرێ د ژیێ زێده‌تر ژ 163 سالیێ دایه‌ و خۆدان ئاڤاهیه‌كێ دوو قاتى یه‌ و ژ 30 ژووران پێك دهێت، و ئێك ژ شینوارێن كه‌ڤن ل قه‌زا ئاكرێ دهێت هژمارتن كۆ ل ده‌مێن بۆریدا چه‌ندین رێڤه‌به‌ریا ل ناڤا ئاڤاهیێ قشلێدا ده‌واما فه‌رمى ئه‌نجام دایه‌.











باسنیوز