ئەمڕۆ چوارشەممە هاوڕێیەکی ئەو گەنجەی كە بەدەستڕێژی گوللە درەنگانی شەوی رابردوو لە خورماتوو كوژرا ڕای گەیاند کە ئەو گەنجە وەزشوان بووە و پیشتریش برایەکی تری لە خورماتوو کوژراوە.

بەكر عەلی، هاوڕێی گەنجە کوژراوەکە ڕایگەیاند: "پشتیوان كەریم قادر كە بەداخەوە درەنگانی شەوی رابردوو كوژرا، گەنجێكی خۆشەویست بوو و ئەو یاریزانی تیپی وەرزشیی (كوردستان) بوو بۆ تۆپی پێی، هەروەها پاسەوانی مەكۆی بزووتنەوەی گۆڕان بووە خورماتوو و پێشتریش برایەكی بەناوی (ئازی) هەر لە خورماتوو كوژراوە".

گوتیشی: "ئەو شوێنەی كە پشتیوانی لێ كوژراوە لە خورماتوو ناوچەیەكی توركمان نشینی شیعە مەزهەبن و بەشێك لە گەنجانی ئەو گەڕەكە چەكداری حەشدی توركمانین".

پێشتر عەمید حوسێن عەلی، بەڕێوەبەری پۆلیسی خورماتوو ڕایگەیاندبوو كە ئەو گەنجە لەلایەن چەند چەكدارێكەوە لەبەردەم نەخۆشخانەی گشتیی خورماتوو كوژراوە و لەبارەی ئەو تاوانەوە لێكۆڵینەوەیان دەست پێ كردووە.

بەپێی زانیارییەكان تاكوو ئێستا كەس لەسەر تاوانی كوشتنی ئەو گەنجە كوردەی خورماتوو دەستگیر نەكراوە و كوشتنی ئەو گەنجە هاووڵاتییانی كوردی شارەكە زۆر تووڕە كردووە و گومان دەكرێت كە لەلایەن چەكدارانی حەشدی توركمانییەوە کوژرابێت.










باسنیوز