جێگرى سەرۆکى فراکسیۆنى پارتى لە پەرلەمانى عێراق، رای گەیاند دەستپێشخەرییەکیان بۆ تێپەڕاندنى پڕۆژەیاساى بودجەى2021ى عێراق ئاراستەى فراکسیۆنە کوردستانییەکان لە ئەنجوومەنی نوێنەرانی عێراق کردووە، چونکە بودجە پەیوەندیى بە قووتى هاووڵاتییانەوە هەیە و پێویستە لە بەغدا یەکدەنگ بین.

بەشار کیکى جێگرى سەرۆکى فراکسیۆنى پارتى لە پەرلەمانى عێراق رايگەیاند: "بە ئامانجى تێپەڕاندنى پڕۆژەیاساى بودجەى 2021ى عێراق کە ئەمڕۆ گەیشتووەتە پەرلەمان، فراکسیۆنى پارتى وەک گەورەترین فراکسیۆنى نێو پەرلەمان کە هەموو کات داواى یەکڕیزى و یەکدەنگیی لە بەغدا کردووە، دەستپێشخەرییەکمان ئاراستەى فراکسیۆنە کوردستانییەکانى پەرلەمانى عێراق کردووە، بۆ ئەوەى بەرامبەر مافە دەستورییەکانى گەلەکەمان یەکهەڵوێست بین".

راشی گەیاند: "پشکى هەرێم لە بودجەى2021ى عێراقدا جێگیر کراوە، بۆیە پێویستە فراکسیۆنە کوردستانییەکان لە پەرلەمان یەکدەنگ و هاوهەڵوێست بین، چونکە بابەتى بودجە پەیوەندیى بە ژیانى هاووڵاتییانى کوردستانەوە هەیە و ناکرێ قووتى هاووڵاتیان بکرێتە قوربانیى موزایەدەى سیاسى".

ئاماژەى بەوەش کرد: "بابەتى مووچەى فەرمانبەرانى هەرێمی کوردستان بە سیاسى کراوە، چونکە بەهۆى ململانێى نێوان ئێران و ئەمریکا لەلایەک و گوشارى بەشێک لە گرووپ و لایەنە شیعەکانى ناو پەرلەمانى عێراق، رەوانەکردنى شایستە داراییەکانى کوردستان لەلایەن حکوومەتى حکوومەتی عێراقەوە دوا کەوتووە، ئەوان دەیانەوێ لەڕێگەى نەناردنى مووچەوە گوشار بخەنە سەر هەرێمی کوردستان و ئامانجە سیاسییەکانیان بپێکن".












باسنيوز