پۆلیسی ڕاپەڕین لەبارەی دۆزینەوەی بڕە پارەیەک لە سنوورەکە ڕوونکردنەوە دەدات
ئەمڕۆ چوارشەممە، ٢٣ی١٢ی٢٠٢٠ شۆڕش ئیسماعیل، گوتەبێژی پۆلیسی ڕاپەڕین، ڕایگەیاند: "هەواڵی دۆزینەوەی بڕە پارەیەکی بازرگانەکەی پشدەر (سلێمان هەڵشۆیی) لە گوندێکی سنوورەکە دوورە لە ڕاستییەوە و هیچ بڕە پارەیەک لەسەر ئەو دۆسیەیە نەدۆزراوەتەوە و هەموو ئەو هەواڵ و دەنگۆیانەی لە تۆڕە کۆمەڵایەتییەکان بڵاو دەکرێنەوە، دوورن لە ڕاستییەوە".
گوتەبێژی پۆلیسی ڕاپەڕین، ڕاشی گەیاند: "تا ئێستاش لێکۆڵینەوەکان بەردەوامن و لەلایەن دادگای لێکۆڵینەوەی پشدەرەوە لێکۆڵینەوە لەگەڵ دەستگیرکراوەکاندا دەکرێت و ئێستا 20 کەس لەسەر دۆسیەی ناوبراو لەلایەن پۆلیسی ڕاپەڕینەوە دەستگیر کراون و 50 کەسیش سکاڵایان تۆمار کردووە، 500 کەسی تریش ناوی خۆیان تۆمار کردووە بۆ تۆمارکردنی سکاڵا".
بەپێی زانیارییەکان تەنیا لە گوندی (دوو گۆمان) ی سنووری پشدەر کە دانیشتوانەکەی زیاتر لە 200 ماڵە، زیاتر لە 180 خێزانی سنوورەکە مامەڵەیان لەگەڵ (سلێمان هەڵشۆی) کردووە و بە مەبەستی مامەڵەکردن چەندین دەفتەر دۆلار و مەڕ و ماڵاتیان پێی داوە".
باسنیوز
