سەرۆكێ‌ باژێرڤانیا شێخان راگەهاند، د چارچۆڤێ‌ نووژەنكرن و پاراستنا جهێن شوونواری دا ل هەرێما كوردستانێ‌ و عیراقێ‌، ئەمریكا 500 هزار دۆلارێن دی ژی بۆ نووژەنكرنا پەرستگەها لالش تەرخانكرن.

ئەندازیار خالد نەرمۆ، سەرۆكێ‌ باژێرڤانیا شێخان دیار كر: "بەری نها ئەمریكا د چارچۆڤێ‌ نووژەنكرن و پاراستنا جهێن شوونواری دا ل هەرێما كوردستانێ‌ و عیراقێ‌ 500 هزار دۆلار بۆ نووژەنكرنا پەرستگەها لالش تەرخانكربوون و ئەو پرۆژە كار تێدا هاتیە كرن و زێدەتری 30% نووژەنكرن هاتیە كرن و نها 500 هزار دۆلارێن دی ژی بۆ هەمان مەرەم تەرخانكرن".

زێدەتر گۆت: "ب سەرپەرشتیا تیمەكا زانكۆیا "بنسلڤانیا" و جڤاتا رۆحانیا ئێزدیان دەست ب كارێ‌ نووژەنكرنا پەرستگەها لالش‌ هاتبووكرن كۆ بۆ ئێكەم جارە كونسولێ‌ ئەمریكا ل عێراقێ‌ كوژمەكێ‌ پارەی بۆ پەرستگەها لالش دابین دكەت و ب ڤی كۆژمەی، دێ‌ ملیۆن دۆلار بۆ نووژەنكرنا پەرستگەهێ‌ هێنە تەرخانكرن و ئەڤە ژی خزمەتەكا باشە بۆ پاراستنا كەلتوورێ‌ ئێزدیان ل هەرێما كوردستانێ‌ دهێتە كرن".

ئەندازیار خالد نەرمۆ خویا كر: "ئەو كەسێن د ناڤ ڤان تیمان دا كەسێن پسپۆر و پرۆفیسورن د بوارێ‌ نووژەنكرنێ‌ دا، ب تایبەت بۆ جهێن شوونواری، لەوما كونسولێ‌ ئەمریكا ئەڤ زانكۆیە دەست نیشانكریە بۆ نووژەنكرنا پەرستگەها لالش".

تێ‌ زانین، بەری نها ژ ئالیێ‌ حۆكمەتا هەرێما كوردستانێ‌ و هژمارەكا خێرخوازان ڤە 500 ملیۆن دینار بۆ نووژەنكرنا پەرستگەهێ‌ هاتبوونە تەرخانكرن و كار تێدا دهێتە كرن و ب رێژەیا مەزن پرۆژە هاتیە بجهئینان.












باسنیوز