کۆرۆنا پێنج کەسی ماڵێکی لە 15 رۆژدا کوشت، تەنیا باوکیان داخزانی بڕبڕەی پشتی هەبووە، ئەوانی دیکە هەموویان ساخ و تەندروست بوون.

لوقمان پێنج خوشک، سێ برا، دایک، باوک، نەنک و پوورى تووشى کۆرۆنا بوون، پێنج کەسیان گیانیان سپارد. تەنیا باوکی نەخۆشى داخزانی بڕبڕەی پشتی هەبووە، ئەوانى دیکە لەسەر ساخى و بە ڤایرۆسەکە یەک لەدواى یەک بە کەمتر لە هەفتەیەک مانەوە بە تووشبوون و لە ماڵەوە مردوون.

لوقمان حاتەم، کەسوکاری پێنج قووربانیی کۆرۆنایە و دەڵێت، "براکەم یەکى مانگ تووشبوو، 5ى مانگ مرد. ئیتر کەسوکار هاتن و تۆزێک قەرەباڵخی دروست بوو. دوای ئەو باوکم گرتی و 11ی مانگ مرد. پووریشم گرتی و 18 مانگ مرد. نەنکم گرتی و 25ی مانگ مرد. دایکیشم گرتی و لە 26ـی مانگ مرد."

رەنگە رۆژانێک ئەو خێزانەش باوەڕیان بە رێکار و خۆپارێزیى نەبووبێت، لانیکەم بۆ مردنى یەکەم کوڕیان و دروستکردنى قەرباڵخى، مردنى چوارى دیکەیان هاتە سەری. ئێستا هەر ئەو خێزانە باشترین گەواهیدەر و بەڵگەیە بۆ ئەوانەى هەندێکیان کۆرۆنا بە سیاسى و هەندێکیشیان بە رەوای نەزانن.

لوقمان حاتەم دەڵێت، "ئێمە ئەوەتا دڵمان بەم کارەساتە سووتاوە. هیوادارم خەڵک لەو شوێنانەى کە قەرباڵخى هەیە، پابەند بن و وەک ئێمە ئەو ئازارە نەچێژن."

ژوورى ئۆپەراسیۆنەکانى سلێمانى کۆمەڵێک رێکار و داخوازیی نوێى راگەیاند کە لەوسەرى هەموویانەوە داواکارییە بۆ خۆپارێزی.

هێرش حەیدەر، سەرۆکى بۆردى رووبەڕووبوونەوەى کۆرۆنا لە سلێمانى راگەیاند، "ئەو شوێنانەى کە کەمالیاتن و بۆ کاتبەسەربردنن یان ناپێویستنن وەک کافتریا و یانەکان و شوێنەکانى پرسە و ئاهەنگکێڕان، لەم قۆناخەدا باشترە دابخرێن. ئێمە لە کارەساتداین، کاتى ئەو شتە ناپێویساتانە نییە."

ئەو رۆژانەی لە هەرێمی کوردستان کەرەنتینە بوو و خەڵک خۆی دەپاراست، رۆژانە تووشبوونی خەڵک لە پەنجەکانى دەست تێنەدەپەڕى و مردنیش دانە و دووان بوو، بەڵام ئێستا تووشبوون بووە بە سەتان و مردنیش دەیان.

rudaw -