ژمارەیەک لە نووسەر و رۆشنبیری هەرێمی کوردستان راگەیێندراوێکیان لەبارەی بڕیارێکی وەزارەتی رۆشنبیریی هەرێمی کوردستان بڵاوکردەوە کە دەڵێت، پێدانی ژمارەی سپاردن بە كتێب ‏تەنیا لە بەرێوەبەرایەتیی گشتیی كتێبخانە گشتییەكان دەبێت. نووسەر و رۆشنبیرەکان دەڵێن، بۆ سانسۆرکردنە، وەزارەتی رۆشنبیریش دڵنیایی دەدات "هیچ هەوڵێک بۆ بەرتەسککردنەوە ئازادی نییە".

رەئوف بێگەرد، نووسەر و وەرگێڕ کە یەکێکە لەو نووسەرانەی راگەیێندراویان بڵاوکردووەتەوە و ژمارەیان زیاتر لە 60 کەسە راگەیاند، بڕیارەکە لە بنەڕەتەوە هەڵەیە، چونکە "وەک لە راگەیێندراوەکەش نووسیومانە، سانسۆرە لەسەر فیکر و نووسین".

لە راگەیێندراوی نووسەر و رۆشنبیرەکاندا ئاماژە بەوە کراوە، "ئەو فۆرمەی لە سانسۆر کە بەڕێوەیە لە ھەرێمەکەی ئێمەدا[هەرێمی کوردستان] و وەزارەتی رۆشنبیری خەریکی دروستکردنیەتی، پلانی ھێرشبردنێکی سیستماتیکییە بۆ سەر کتێب بەر لە لەدایکبوونیان. رەچەتەیەکە بۆ رێگەگرتن لە لەدایکبوونی کتێب و خنکاندنی بەر لەوەی بگاتە بەردەمی خوێنەران".

هاوکات وەزارەتی رۆشنبیریی حکومەتی هەرێمی کوردستان روونکردنەوەیەکی بڵاوکردووەتەوە و ئاماژەی بەوە کردووە، ئەو بڕیارەیان پشتی بە رێنمایی ژمارە 6ـی ساڵی 1999ـی وەزارەتی رۆشنبیری بەستووە، كە ئەویش لەبەر رۆشنایی یاسای چاپەمەنیی هەرێمی كوردستان ژمارە 10ـی ساڵی 1993 دەرچووە. "فەرمانەكەی وەزارەتمان هیچ نیەتێکی خراپی بۆ بەرتەسككردنەوەی ئازادیی بیروڕا لەپشتەوە نییە".

هەرچەندە وەزارەتی رۆشنبیری لە روونکردنەوەکەیدا دڵنیایی داوە کە "هیچ هەوڵێك بۆ بەرتەسكکردنەوەی ئازادی نییە"، بەڵام رەئوف بێگەرد بە رووداوی گوت، روونکردنەوەکە و بڕیارەکەش رەتدەکەنەوە، چونکە روونکردنەوەکەش بەشێکە لە بڕیارەکە، هەردووکیان "سانسۆر لەسەر فیکر و نووسین دەهێڵنەوە". لەبارەی هەنگاوی داهاتوویشیان، گوتی، "دەبێت گوێ بگرن [وەزارەتی رۆشنبیری]، دەست بە گفتوگۆ دەکەینەوە، ئەگەر گوێیان نەگرت، ئەوکات لەوانەیە راگەیێندراوێکی تووندتر دەربکەین".

ئاسۆس هەردی، نووسەرێکی دیکەیە و لە فەیسبووکی خۆی لەبارەی بڕیارەکە نووسیویەتی، "پێم وایە بڕیارەکەی وەزارەتی رۆشنبیری هەر نییەتێکی لەپشتەوە بێت، دواجار جگە لە دەرفەتدان بە سانسۆر، هیچ ئامانجێک ناپێکێت".

لە چوارچێوەی کاردانەوەی بڕیارەکەدا، بەختیار عەلی، نووسەر و رۆماننووسی کورد، رایگەیاندبوو، بۆ یەکەمجار و وەک دەربڕینی ناڕەزایی، رۆمانێکی نوێی بەبێ وەرگرتنی ژمارەی سپاردن چاپدەکات. رەئوف بێگەرد گوتی، "منیش ئەگەر کتێبێک چاپ بکەم، نایدەمە ئەوان، چونکە نازانم کێ بەسەریا دەچێتەوە، خوێنەوارە، نەخوێنەوارە، لە فیکر دەزانێت یان نا".

وەزارەتی رۆشنبیری لە روونکردنەوەکەیدا ئەوەشی نووسیوە، ئەو بڕیارە بۆ رێكخستنەوەی پێدانی ژمارەی سپاردنە، بەجۆرێك رێگە لە بڵاوكردنەوەی ئەو كتێبانە بگرێ‌ كە زمانی كوردی دەشێوێنن، داڕشتن‌ و رێزمانی كوردی‌ و خاڵبەندی لەبەرچاو ناگرن. هەروەها بۆ ئەوەی كتێبەكان مافی خەڵكی دیكە پێشێل نەكەن ‌و سنوورێك بۆ جنێودان‌ و ناوزڕاندن دابنرێت".
rudaw -