کەمێک پێش ئێستا ژمارەیەکی زۆر لە خاوەن پشکەکانی پڕۆژەی گەشتیاری چاڤی لاند، لەبەردەم گوندی ئەڵمانی خۆپیشاندانێکی ناڕەزاتییان ئەنجامدا.

لەمبارەیەوە پەیامنێری (باسنیوز) ڕایگەیاند، لەلایەن چەند کەسێکی نەناسراوەوە ھێرشی توند کرایە سەر خاوەن پشکەکانی چاڤیلاند و چەند خاوەن پشکێک بریندار بوون.

دلێر محەمەد، یەکێک لە خاوەن پشکەکانی چاڤی لاند ڕایگەیاند: "ئەو کەسانەی ھێرشیان کردوەتە سەر خاوەن پشکەکانی چاڤی لاند، بەشێکی پاسەوانی گوندی ئەڵمانی بوون کە خودی شاسوار عەبدولواحید لەو گوندەدا دەژی و ئۆفیسی بارەگاکەشی لەوێیە".

ئەوەشی خستەڕوو، چەند کەسێکی دیکە کە پەلاماری خاوەن پشکەکانیان داوە پاسەوانی بەرپرسێکی ئەمنی یەکێتین کە ماڵەکەی لەنێو گوندی ئەڵمانی دایە و دراوسێی شاسوار عەدولواحیدە، بەڵام ئێستا ئەو کەسانەی ھێرشەکەیان ئەنجامداوە ھەڵاتوون.

لەئێستادا ھێزەکانی پۆلیس ھاتوونەتە شوێنی ڕووداوەکە و چەند کەسێکیان دەستگیرکردووە کە گومان دەکرێت، دەستیان ھەبووبیت لە ھێرشکردنە سەر خاوەن پشکەکانی پڕۆژەی گەشتیاری چاڤی لاند.











باسنیوز