ئەمڕۆ ژمارەیەك عەرەبی ھاوردە براونەتە سنووری قەزای دووزخورماتوو، ھەوڵدەدرێت لەسەر زەوی ھاووڵاتییانی كورد نیشتەجێیان بكەن، ھاووڵاتییانی كوردیش دژی ئەو ھەوڵە گردبوونەوە و داوا دەكەن لایەنە پەیوەندیدارەكان لەسەر ئەو زوڵمە بێنەدەنگ و تەعریبكردنی ناوچە كوردستانییەكان رابگیرێت.

ھێزێكی زۆری سەربازیی لەگەڵ عەرەبە ھاوردەكان ھاتوونەتە سنووری دووزخورماتوو، دەیانەوێت لە گوندەكانی ئەو سنوورە دەست بەسەر زەوی ھاووڵاتییانی كورد دا بگرن. ھاووڵاتییانی كوردیش بەرگری دەكەن و دەیانەوێت رێگری لە نیشتەجێكردنی عەرەبە ھاوردەكان بكەن، بەو ھۆیەوە گرژیی دروستبووە، ھێزە ئەمنییەكانی عێراقیش ھەوڵی بڵاوەپێكردنی ھاووڵاتییانی كورد دەدەن.

ھاووڵاتییەكی كورد بە كوردستان24ی گوت: "لە سەردەمی رژێمی بەعس ئەو عەرەبانە ھێندرابوونە سەر موڵك و ماڵی ئێمە، دوای پرۆسەی ئازادی عێراق ئێمە وەرمانگرتەوە، ئێستا جارێكی دیكە بە پلان و پاڵپشتی پارێزگاری سەڵاحەدین دەگەڕێندرێنەوە سەر زەوییەكانمان".

پەیوەست بەو پرسە مەلا حەسەن، دووزی ئەندامی پێشووی ئەنجومەنی پارێزگای سەڵاحەدین بە كوردستان24ی راگەیاند "خەڵکی گوندەکانی ئەەو سنوورە کە کوردن و زیدی خۆیانە دەیانەوێت رێگری لە گەڕانەوەی عەرەبی هاوردە بکەن و بەرەنگاری هێزە سەربازییەکان بوونەتەوە و خۆپێشاندانیان كردووە".






K24