جڤاتا زومار: هەیڤەكە هندەك گوندێن زومار دبێ ئاڤا ڤەخۆارنێ نە
ئەحمەد مەلا حەسەن، سەرۆكێ جڤاتا ناحیا زومار دیار كر: "رەوشا زومار وارێ خزمەتگوزاری دا زۆر خراب بوویە بتایبەتی ژی ئاڤ و كارەب كو 24 دەمژمێران پتر ژ 16 دەمژمێران كارەب ژ خەلكێ زومار دهێتە برین. خەلك بێ كارەب دمینن هەر وەسا ژی هندەك گوندێن سەر زومار ڤە ئەڤە هەیڤەكە دبێ ئاڤا ڤەخۆارنێ دڤێ وەرزێ هاڤینێ دا. خەلك زۆر گازندەیان دكەن وپشتەڤانیا زومار ناهێتە كرن بۆ چێكرنا پرۆژان. ئەم دشێن بێژن خزمەتگوزاری ل زومار سفرن چوو خزمەت بۆ وەلاتیان ناهێتە كرن. نۆكە ناحیا زومار زۆر پێدڤی هەموو جۆرێن خزمەتگوزاریان هەیە".
خویا ژی كر: "دەمێ تیرۆرستێن داعش زومار داگیركرین هەموو ئامێرێن باژێرڤانیێ ژناڤبرن. هەتا نۆكە ژی باژێرڤانیا زومار یا بێ ئامێرن ژبەر ھندێ نەشێت هیچ كارەكێ ئەنجام بدەت. بتایبەتی ژی وارێ چێكرن وسەخبیریا جادەیێن دەڤەرێ دا زۆر بێ سەروبەربووینە".
باسنيوز
