رێڤەبەرێ‌ نڤیسینگەها رزگاركرنا رەڤاندیێن ئێزدی دیار كر هەتا نۆكە هیچ كەس و لایەنەكێ‌ ل دونیایێ هەڤكاری نەكریە بۆ رزگاركرنا رەڤاندیێن ئێزدی بتنێ وب شێوەیەكێ‌ بەردەوام ئەڤە پێنچ سالن سەرۆك بارزانی وحكومەتا كوردستانێ‌ هەڤكاری وپشتەڤانی ل ئێزدیان دكەن بۆ رزگاركرنا هەموو رەڤاندیان.

حسین قائێدی، رێڤەبەرێ‌ نڤیسینگەها رزگاركرنا رەڤاندیێن ئێزدی دیار كر: "ئەڤرۆ 1/8/2019 دێ پرێس كۆنفرانسەك لسەر جینوسایدا شنگال و كاروچالاكیێن نڤیسنگەهێ‌ هێتە سازكرن ، پێنچ سال ب سەرجینوسایدا شنگالێ دا دەربازدبن و هێشتا كەس و كارێن مە ل هندەك ژ جهێن عێراق، سووریا، توركیا و هەژمارەكا وەلاتێن دی ماینە و ب خێزانێن خوە شاد نەبووینە، ل هەمبەر ژی كۆمەلگەها نێڤدەولەتی و حكومەتا عێراقێ تا وێ ئاستێ خەمسارن كو ئێدی هەر ناپرسن ژی چارەنڤێسێ سەدان، ژن و زەلام و خوشك و زارۆیێن مە ئەوێن كەڤتین دەست تیرۆرستێن داعشێ بەر ب چ ئاقارەكێ بەرزە چوویە. هێشتا دناڤ كەمپا هۆلێ ودناڤ خێزانێن داعشێ‌ دا ماینە. ئەم هەولێن بەردەوامداینە بۆ رزگاركرنا هەموو رەڤاندیێان".

خویا ژی كر: "هەر ژ دەستپێكێ و تا نها بەردەوام دەنگێ خوە د گەهینینە جیهانێ كو چەرخێ بیست و ئێكێ یە و مرۆڤ د ڤی چەرخی دا ب كۆم هاتنە بن ئاخكرن، كڕین و فرۆتن وەكی بەری هزاران سالان پێ هاتەكرن، كۆلەتی و ئۆل گوهۆڕین ب چاڤ هاتنە دیتن، لەو د خوازین زێدەتر گرنگی ب رزگاربوویان بهێتە دان و هەموو جیهان ب چاڤێ قوربانی تەماشەی وان رزگاربوویان بكەت".

ئاشكەرا كر: "ل رۆژا 3/8/2014ێ‌ تیرۆرستێن داعش كۆمەلكوژی ل شنگال دروستكرن و 6ھەزار417 كەس رەڤاندن. ب پشتەڤانیا نڤیسینگەها نیچێرڤان بارزانی هەتا نۆكە 3 ھەزارو 509 كەس ژ دەستێن تیرۆرستێن داعش رزگاربووینە هێشتا چارەنڤیسێ 2ھەزار و908 كەس دەستێن تیرۆرستێن داعشدا دیار نینە".









باسنيوز