به ‌بۆنه‌ی هه‌ڵبژاردنی وه‌ك میرى ئێزدییانی كوردستان و جیهان، سه‌رۆكایه‌تیی په‌رله‌مانی كوردستان په‌یامێكی پیرۆزبایى ئاراسته‌ی میر حازم ته‌حسین به‌گ كرد.

لە پەیامەکەی سەرۆکایەتیی پەرلەمانی کوردستاندا هاتووە: "لەگەڵ پەرلەمان و حکوومەتی عێراق لەسەر هێڵ دەبین بۆ ئەوەی عێراق ببێتە ئەندام لە دادگای تاوانەکانی نێودەوڵەتی، بۆ ئەوەی کەیسی کۆمەڵکوژییەکەی خوشک و برایانی ئێزدی بە فەرمی دانی پێدا بندرێت و تاوانباران دادگایی بکرێن و قەرەبووی قوربانییەکانیش بکرێتەوە"



دەقی پەیامەکە:

بۆ بەڕێز میر حازم ته‌حسین بەگ

بەبۆنەی هەڵبژاردنت بەمیری ئێزدییانی کوردستان و جیهان گەرمترین پیرۆزبایت ئاراستە دەکەین.

کوردانی ئێزدی پێکهاتەی ڕەسەنی ئەم وڵاتەن، پەرلەمانی کوردستانیش پڕۆژە یاسایەکی تایبەت بەکۆمەڵکوژیی خوشک و برا ئێزدییەکانی لەبەردەستدایە و هەوڵ دەدەین بە زوویی پەسند بکرێت و لەگەڵ پەرلەمان و حکوومەتی عێراق لەسەر هێڵ دەبین بۆ ئەوەی عێراق ببێتە ئەندام لە دادگای تاوانەکانی نێودەوڵەتی، بۆ ئەوەی کەیسی کۆمەڵکوژییەکەی خوشک و برایانی ئێزدی بە فەرمی دانی پێدا بندرێت و تاوانباران دادگایی بکرێن و قەرەبووی قوربانییەکانیش بکرێتەوە.

جارێکیتر پیرۆزبایى لە بەڕێزتان و تەواوی کوردانی ئێزدیی کوردستان و جیهان دەکەین.

سەرۆکایەتیی پەرلەمانی کوردستان

2019/7/27










باسنيوز