نوێنەرێكی پارێزگای مووسڵ لە ئەنجوومەنی نوێنەرانی عێراق دەڵێ، شەوی ڕابردوو جارێكی دیكە داعش ھێرشی كردووەتە سەر گوندێكی سنووری مووسڵ و سەرۆك ھۆزێك و خوارزایەكیان كوشتووە. جەختیشی كردەوە، داعش بووەتە مەترسییەكی جیددی بۆ سەر پارێزگای مووسڵ و بە فەرمییش حكوومەت ئاگادار كراوەتەوە، چونكە ژمارەیان زۆرە و تەنھا لە مووسڵ فەرمانی گرتن بۆ ٧٠ھەزار داعش ھەیە.

شێروان دووبەردانی، گوتی، شەوی ڕابردوو داعش جارێكی دیكە ھێرشی كردووەتەوە سەر گوندی زوێریجی سەر بە ناحیەی حەمام عەلیلی سەر بە پارێزگای مووسڵ و شێخێك و خوارزاكەی بە ناوی شێخ عەلی خەزعەل بەدرانی سەرۆكی فەزلی ئەبوحەجییە و ئەوەی دیكەش بە ناوی ئەرشەد یاسینە و چەند خولەكێكیش روبەڕووی داعش بوونەتەوە، بەڵام دواتر كوژراون و ھیچ ھێزێكیش نەبووە پارێزگارییان لێ بكات، بۆیە ھەردووكیان كوژراون.

دووبەردانی گوتیشی، داعش لە سنووری مووسڵ بە شێوەیەكی بەرچاو جموجۆڵی زیادی كردووە و بووەتە مەترسییەكی جیددی بۆ سەر شارەكە، چونكە لە دادگاكانی مووسڵ فەرمانی دەستگیركردن بۆ ٧٠ھەزار داعش دەركراوە، بۆیە داعش ژمارەیان زۆرە لەناو مووسڵ و ھێزە ئەمنییەكانیش بە ھۆی گەندەڵییەوە ئاگایان لە پاراستنی مووسڵ نەماوە، بۆیە ئەگەر رێگری نەكرێت، دۆخی ئەمنیی مووسڵ بە تەواوی تێكدەچێت.


kdp -