بەڕێوەبەری غازی هەولێر ڕایدەگەیەنێت، ئێستا جگە لە كارگە حكوومییەكان، چەند كارگەیەكی ئەهلیش غاز بەرهەم دەهێنن و لە گەڕەكەكانی هەولێر دەیفرۆشنەوە، كە بەرهەمەكانیشیان لە ژێر چاودێریی حكوومەتدا نییە، بۆیە بۆ سەلامەتیی هاووڵاتیان، داوا دەكەین كە تەنها غاز لە بریكارە رێپێدراوەكانی حكوومەت بكڕن.

بەختیار پشدەری، ڕاگەیاند: "ئەو غازەی كە حكوومەتی هەرێم بەرهەمی دەهێنێت، لەگەڵ پێوەرەكان گونجاوە لە ڕووی سەلامەتی و باشیی بتڵەكان و كێشی غازەكەش، بۆیە داواكارین كە هاووڵاتیان تەنها غاز لە بریكارە رێپێدراوەكانی حكوومەت بكڕن، چونكە باوەڕپێكراون و بۆ سەلامەتیی هاووڵاتیانیش باشترە".

لەبارەی خۆپێشاندانی بریكارەكانی غازفرۆشتن سەبارەت بە نەفرۆشتنی غاز لەلایەن ئەو كەسانەی بریكاری فەرمی نین، بەڕێوەبەری غازی هەولێر گوتی: "پشتگیری لە داواكارییەكانیان دەكەین، چونكە بەشێك لەو بتڵانەی كە لە كارگە ئەهلییەكان دەفرۆشرێت، مەرجی سەلامەتییان تێدا نییە، هاوكات بریكارە فەرمییەكان لە ژێر چاودێریی حكوومەتدان و ساڵانەش باج دەدەن، بۆیە ئەوە مافی ئەوانە كە ئەم كارە بكەن".

پشدەری ڕاشیگەیاند، بەرهەمی غازی كوردستان ئێستا لە پێویستیی ناوخۆ زیاترە و ئەمەش جێگای دڵخۆشییە بۆ هەمووان.


kdp -