بەڕێوەبەرایەتیی گشتیی چاکسازیی هەرێمی کوردستان، پرۆژەیەکی خێرخوازی ڕاگەیاندووە کە بەشێکی بە پەرتووککردنی چاکاسازییە و لەلایەن دەزگای خێرخوازیی بارزانییەوە جێبەجێ دەکرێت.

لەمبارەوە مووسا ئەحمەد، سەرۆکی دەزگای خێرخوازیی بارزانی ئەمڕۆ چوارشەممە 2019.7.24 لە پرێس کۆنفرانسێکدا گوتی: "ئێمە وەکوو دەزگای خێرخوازیی بارزانی خۆشحاڵ و سەربەرزین کەلە جێبەجێکردنی ئەم پرۆژەیەدا ڕۆڵمان هەیە و هەر لە سەرەتای دروستبوونی ئەم دەزگایەوە، ئەمە یەکێک لە خواستە سەرەکییەکانمان بووە کە چۆن بتوانین ببینە پردێک لە نێوان خەڵکی دەوڵەمەند و خێرخواز خەڵکی هەژار هەتا بتوانین بۆشاییەکان پڕ بکەینەوە".

سەرۆکی دەزگای خێرخوازیی بارزانی گوتیشی: "ئێمە بەڵێنی ئەوەش دەدەین کەلە جێبەجێکردنی پرۆژەی لەم چەشنە بەردەوام بین، چونکە ئەمە خواستی سەرەکیی دەزاگی خێرخوازیی بارزانی بووە و بۆ مەبەستی خێرخوازی و یارمەتیی خەڵک دامەزراوە، بەڵام بەهۆی بارودۆخێک کە هاتووەتە پێش و ئەو ژمارە زۆرەی ئاوارە و پەنابەر کە روویان لە هەرێمی کوردستان کرد، وایان کرد کە ڕۆڵی ئەم دەزگایە لەمجۆرە چالاکییانەدا کەمتر بەدی بکرێت و زیاتر بپەرژێینە سەر چالاکییە مرۆییەکان و خزمەتی ئاوارە و پەنابەران".

مووسا ئەحمەد گوتیشی: "بە خۆشییەوە بە پشتیوانیی هاووڵاتییان و خێرخوازانی کوردستان، دەزگای خێرخوازیی کوردستان توانیویەتی نەتەنیا لە ئاستی کوردستان و هەرێمی، بەڵکوو نێودەوڵەتی لە پێشوازی و خزمەتکردنی ئاوارە و پەنابەراندا بگێڕێت و ئەمەش وای کردووە ئەو کەسانەی لە بواری مرۆییدا دیار و بەرچاوەن، هەروەک چۆن شانازی بە پێشمەرگە دەکەن، ئاواش لە کارە جوانیە مرۆییەکانی خەڵکی کوردستاندا دەکەن کە لەپێناو خزمەت و ڕێزگرتن لە ئاوارە و پەنابەراندا کردوویانە".

ئاماژەی بەوەش کرد: "وێڕای ئەو گرفت و ئاستەنگ و تەنگ و چەڵەمە ئابوورییانەی کە بۆمان هاتوونەتە پێش، بەڵام بارودۆخی ئاوارە و پەنابەران هەموو کات لە کوردستان لە ناوچە و وڵاتانی گەورە باشتر بووە، تەنانەت ئەو وڵاتانەش کە مێژوویەکی دوورودرێژیان لەم بوارەدا هەیە وەک تورکیا، ئوردون و لوبنان کە ئاوارە و پەنابەرەکان تێیدا دۆخیان باش نەبووە و ئەم شانازی و پێگەیەش بەهۆی پاڵپشتیی ئێوە لە حکوومەتی هەرێم و ئێمەمانان بوون کە بواتنین ئەو ئەرک و ڕۆڵە شیاوانە بگێڕین".










باسنيوز