شەوی رابردوو کاتێدرالی نۆتر دام دو پاریس، یەکێک لە بەناوبانگترین شوێنە مێژووییەکانی پاریس ئاگری گرت و بەشێکی زۆری سووتا، سەرۆکوەزیرانی هەرێمی کوردستان بەو بۆنەویەوە هاوسۆزی خۆی بۆ خەڵکی فەرەنسا دەردەبڕێت.

نێچیرڤان بارزانی لە توویتێکدا لەکاتی رووداوەکە نووسیویەتی "هاوسۆزی خۆم بۆ خەڵکی پاریس و فەرەنسا بەگشتی دەردەبڕم، ئەمە کاتێکی زەحمەتە کە کاتێدرالی نۆتر دام، شوێنێکی کولتووریی دەگمەنی فەرەنسا و جیهان ئاگری گرتووە".

شەوی رابردوو ئاگر بەشێکی نۆتر دامی سووتاند و لەناویبرد، پێش کۆنترۆڵکردنی ئاگرەکەش، ئیمانوێل ماکرۆن، سەرۆکی فەرەنسا رایگەیاند کاتێدرالەکە نۆژەندەکەنەوە.

هەرچەندە تیمەکانی ئاگرکوژێنەوەی پاریس توانیان بە نۆ کاژێر کاتێدرالەکە لە لەناوچوون بپارێزن، بەڵام سەقف و بورجەکەی سووتان و رووخان.

لەبارەی هۆکاری هەڵگیرسانی ئاگرەکەش، هێشتا زانیاریی ورد نییە، بەڵام بەرپرسانی پاریس دەڵێن رەنگە بەهۆی کاری نۆژەنکردنەوە بووبێت، کە لە بەشێکی کاتێدرالەکە ئەنجامدەدرا.








رووداو -