سەرۆکی فراکسیۆنی پارتی دیموکراتی کوردستان لە ئەنجومەنی پارێزگای ھەولێر ڕای دەگەیەنێت، تیمێکی ئەندازیاری بەدواداچوون بۆ گرفتەکانی شەقامی ئیسکان لە هەولێر دەکات و ھەر گرفتێک لەو شەقامەدا ھەبێت، چارەسەر دەکرێت.

کەنعان خەیلانی، سەرۆکی فراکسیۆنی پارتی لە ئەنجومەنی پارێزگای ھەولێر ڕايگەیاند: ”پلانی نوێکردنەوەی شەقامی ئیسکان وابوو کە لەسەر ڕێنماییەکانی یونسکۆ نۆژەن بکرێتەوە، بەڵام ئەو داھاتەی وەزارەتی شارەوانی کە ھەبوو، ئەوەندە نەبوو کە پڕۆژەکە پێویستی بوو“.

سەرۆکی فراکسیۆنی پارتی ڕوونیشی کردەوە: ”پارەی پڕۆژەکە ئەوەندە نەبوو کە ھاوشێوەی شەقامەکانی بن قەڵات کەرپووچ بکرێ، ھەر بۆیە شەقامی ئیسکان قیڕتاو کرایەوە و کارەکانی بەشێوەیەکی ئەندازیاری لە ژێر سەرپەرشتیی ئەندازیارانی شارەوانیی ھەولێر کراوە“.

ئەو بابەتانەشی ڕەت کردەوە کە لە ڕاگەیاندنەکانەوە لەبارەی کێشەی شەقامەکە دەخرێنە ڕوو و ڕای گەیاند: ”ئێستاش لەلایەن تیمێکی ئەندازیارییەوە، بەدواداچوون بۆ شەقامەکە دەکرێ و ھەر گرفتێک ھەبێت، لەلایەن حکوومەتەوە چارەسەر دەکرێت“.

خەیلانی نەیشاردەوە کە هێشتا بە فەرمی شەقامەکە نەکراوەتەوە و هەر کەموکوڕییەکیشی هەبێت، پێش بە فەرمی کردنەوەی، چارەسەر دەکرێت.













باسنيوز