سەرۆکی ئەنجومەنی پارێزگای مووسڵ ڕایگەیاند، دوای تەواوبوونی ڕێکارە یاساییەکانی پارێزگاری ڕابردوو دەرگای خۆپاڵاوتنی پارێزگارێکی نوێ دەکرێتەوە.

دوای نقومبوونی بەلەمێکی گەشتیاری لە ڕووباری دیجلەی شاری مووسڵ زیاتر لە ١٠٠ کەس بوونەتە قوربانی، بە بڕیارێک نۆفەل عاگووب، پارێزگاری مووسڵ و هەردوو جێگرەکەی لەسەر کار لادران.

سەیدۆ چەتۆ، بە ماڵپەڕی فەرمیی پارتی دیموکراتی کوردستان ڕایگەیاند: "دوای لەسەرکارلادانی پارێزگاری مووسڵ لە لایەن سەرۆکوەزیرانی عێراقەوە، ئێستا شانەی تەنگەژەکان مووسڵ بەڕێوە دەبەن، بۆشایی لە پۆستەکاندا هەیە و دوای تەواوبوونی ڕێکارە یاسایییەکانی پارێزگای لەسەرکارلادراو دەرگای خۆپاڵاوتن دەکەینەوە."

سەیدۆ چەتۆ گوتیشی: "بەزوویی مەرجی پارێزگاری نوێی مووسڵ بڵاو دەکەینەوە، چەندین مەرج بۆ ئەو پۆستە هەن و تا ئیستاش دیار نییە کێ خۆی بەربژێر دەکات بۆ ئەو پۆستە."

سەرۆکی ئەنجومەنی پارێزگای مووسڵ ئاماژەیشی دا: "ڕێکارە یاسایییەکان مانگ و نیوێک دەخایەنن، ئەویش تانەلێدان و دادگاییی نێوخۆیییە و دواتر پارێزگارێکی نوێ دەستنیشان دەکەین."

kdp-