بەڕێوەبەری پۆلیسی شارەوانی هەولێر ڕای دەگەیەنێت، کە دەستیان بەسەر هەزار کارتۆن کەلوپەلی جوانکاری ماوە بەسەرچوودا گرتووە و بڕیاردرا خاوەنەکەی بدرێتە دادگا.

موقەدەمی مافپەروەر سۆران مەحموود، بەڕێوەبەری پۆلیسی شارەوانی هەولێر ڕايگەیاند: ”ڕۆژی 27/3/2019، توانیمان دەست بەسەر هەزار کارتۆن کەلوپەلی جوانکاری لە یەکێک لە سەنتەرەکانی جوانکاری شاری هەولێردا بگرین“.

گوتیشی: ”لەو سەنتەرەدا مادە بەسەرچووەکان بەروارەکەیان لابراوە و سەرلەنوێ لەزگەیان لێ داوەتەوە، هەروەها مادەکان لەوێوە بۆ سەنتەرەکانی دیکە و شارەکانی ناوەڕاست و خواروی عێراق ڕەوانە کراوە“.

ئەوەشی خستە ڕوو، خەڵک ئەو زانیاریانەی بە پۆلیسی هەولێر داوە و لەو ڕێگایەوە بەدواداچوون کراوە، ئاماژەی بەوەدا ”لێژنەی بەدواداچوونی دەرمان ئەمڕۆ پێنجشەممە 28/3/2019، بڕیاری دا کە خاوەنی سەنتەرەکە بداتە دادگا، لەوێوە ڕێو شوێنی بەرامبەر بگیرێتەبەر“.










باسنيوز