ئەندامێکی پەرلەمانی کوردستان لە فراکسیۆنی پارتی دیموکراتی کوردستان ئاشکرای کرد کە ”لە نزیکترین کاتدا“ یاسای سەرۆکایەتیی ھەرێم پێشکەش بە دەستەی سەرۆکایەتیی پەرلەمان دەکرێت.

ھێڤیدار ئەحمەد، ئەندامی پەرلەمانی کوردستان لە فراکسیۆنی پارتی ڕايگەیاند، چاوەڕوان دەکەن یاسای سەرۆکایەتیی هەرێم پێشکەش بە دەستەی سەرۆکایەتی بکرێت و ”لە نزیکترین کاتیشدا“ ئەوە دەکرێت، چونکە ”گفتوگۆیەکی گەرم لە نێوان پارتی و گۆڕان، پارتی و یەکێتی و فراکسیۆنەکانیشیان لە پەرلەماندا ھەیە“.

ئەندامەکەی پەرلەمانی کوردستان باس لەوەش دەکات، تا ئێستا چەند کۆبوونەوەیەک لەسەر ئەو بابەتە کراوە، تاوەکوو ئەوەی بگەنە ڕێککەوتنی کۆتایی و ئەو یاسایە پێشکەش بکەن.

لەبارەی ئەگەری بەشدارینەکردنی فراکسیۆنی یەکێتی لە کۆبوونەوەی پەرلەمان لە کاتی تێپەڕاندنی یاسای سەرۆکایەتیی ھەرێم، پەرلەمانتارەکەی پارتی دەڵێت: ”باوەڕناکەین یەکێتی ئەو بڕیارە بدات، ئەگەر ئەو ھەنگاوەش بھاوێ، ئەوا ڕەنگە بۆ خودی یەکێتی گونجاو نەبێت“.










باسنيوز