بەڕێوەبەرایەتیی پۆلیسی سلێمانی لە ڕاگەیاندراوێکدا ئاشکرای کرد، تۆمەتبارێک دەستگیر کرا کە ویستبووی لە ناو بانکێکی سلێمانی گیرفانی ھاووڵاتییان ببڕێتِ.

ئەمڕۆ چوارشەممە 27/3/2019، بەڕێوەبەرایەتیی پۆلیسی سلێمانی ڕاگەیاندراوێکی لە پەیجی فەرمیی خۆی، لە تۆڕی کۆمەڵایەتیی (فەیسبووک) بڵاو کردەوە، تێیدا ھاتووە: "ئەمڕۆ چوارشەممە 27/3/2019، ھێزەکانی پۆلیسی پارێزگای سلێمانی تۆمەتبارێکی بە ڕەگەز ئێرانییان دەستگیر کرد، کە ویستبووی لەناو بانکی ڕەشید لە شاری سلێمانی گیرفانی ھاووڵاتییان ببڕێت".

باس لەوەش کراوە: "دوێنێ سێشەممە تۆمەتبارێک بە مەبەستی بڕینی گیرفانی ھاووڵاتییان سەردانی بانکی ڕەشیدی کردووە، دوای ئەوەی بڕی 50 ھەزار دیناری عێراقی لەسەر مێزی یەکێک لە کارمەندەکانی بانکەکە دەبینێت، دەیبات و ھەڵدێت".

پۆلیسی سلێمانی ڕوونیشی کردووەتەوە: "ھێزەکانی پۆلیسی پارێزگای سلێمانی لە ڕووداوەکە ئاگادار کرانەوە و بەدواداچوونەکان دەستیان پێ کرد و دوای لێدانەوەی کامێرای چاودێری، تۆمەتبارەکە ناسرایەوە، ئەمڕۆ و بەھەمان مەبەست تۆمەتبارەکە سەردانی بانکەکەی کردووەتەوە، لەوێ لەلایەن ھێزەکانی پۆلیسەوە تۆمەتبارەکە ناسراوەتەوە و دەستگیر کراوە".

لە ڕاگەیاندراوەکەدا ئەوەش خراوەتە ڕوو: "تۆمەتبارەکە (ڕ، ب، ر) بە ڕەگەز ئێرانی، بە بڕیاری دادوەر و بەپێی ماددەی 444 لە یاسای سزادانی عێراقی ڕاگیراوە".










باسنيوز