لە رێگەی بەرنامەیەکی حکوومەتەوە، وەزارەتی دارایی ھەرێمی کوردستان بانکەکانی لە ٩٧ بانک بۆ ٣٠ بانک کەم دەکاتەوە. بەرپرسێکیش زانیاری لەبارەی پڕۆسەی کەمکردنەوەکە دەدات و ئاشکرای دەکات، ئەو کارە لە بەرژەوەندیی ھاووڵاتییان و مووچەخۆراندا دەبێت.



مستەفا سەعید، بەڕێوەبەری تەکنەلۆژیای بانکەکان لە وەزارەتی دارایی راگەیاند، حکوومەت نایەوێت بانکەکانی بەم جۆر بمێنێتەوە، بۆیە وەزارەتی دارایی بانکەکانی کەم دەکاتەوە، گوتی: «حکوومەت لە رێگەی بەرنامەیەکەوە دەیەوێت بانکەکانی بۆ ٣٠ بانک کەم بکاتەوە، ئەوەش بۆ کارەکانی ئێمە و بە تەکنەلۆژیکردنی بانکەکان ئاسانترە».



ئاشکراشی کرد: «ئێستا لە ھەرێمی کوردستان ٩٧ بانکی حکوومی ھەیە».



گوتیشی: «ئەو ھەموو بانکە حکوومییە زۆر زۆرە و لە ھیچ شوێنێکی دونیا ھاوشێوەی ئێمە ئەو ھەموو بانکە حکوومییە نییە، ئەوەش رۆتینی زۆر کردووە و خەرجیی زۆریشی خستووەتە سەر حکوومەت، چونکە بەشێک لە بانکەکان لە خانوو و بینای کرێدان».



جەختیی کردەوە، بە کەمکردنەوەی بانکە حکوومییەکان پارە و خەرجییەکی زۆر بۆ حکوومەت دەگەڕێتەوە، گوتیشی: «کاتێک بانکەکان بە ئەلیکترۆنی دەکرێن، یەک بانک دەتوانێت کاری ١٠ بانک بکات، ھەروەھا ئەو خزمەتگوزارییانەی لەو بانکە ئەلیکترۆنییانە پێشکەش دەکرێن زۆر بەسوودە بۆ ھاووڵاتییان و و مووچەخۆران».



بەڕێوەبەری تەکنەلۆژیای بانکەکان لە وەزارەتی دارایی، لەبارەی چارەنووسی فەرمانبەرانی بانکەکان گوتی: «ئەو بانکانەی ھەڵدەوشێدرێنەوە، تێکەڵ دەکرێن و ھیچ کێشەیان نابێت و کاری خۆیان دەکەن، چونکە فەرمانبەران لە پلانی تێکەڵکردنی بانکەکان حیسابی خۆیان بۆ کراوە و مافەکانیان لەبەرچاو دەگیرێت».



مستەفا سەعید، دووپاتیشی کردەوە، سیستەمێکی تازە بۆ بانکە حکوومییەکان کاری پێ دەکرێت، گوتیشی: «ئەو بانکانەی ئیشوکاریان زۆرە، ھەڵیاندەبژێرین و ئەوان دەکەینە سیستەمی ئەلیکترۆنی و ئیشکردن لە رێگەی دەستی نامێنێت و دەبێتە ئەلیکترۆنی، کارەکان شەفافتر و خێراتر دەبن و ئاسانکارییەکی زیاتریشە بۆ ھاووڵاتییان».










باسنیوز