حەشدی شەعبی تەنگی بە كریستیانەكانی دەشتی نەینەوا ھەڵچنیوە و دەیانەوێ ھەموو زەوی و خانوو و شوێنە بازرگانییەكانیان بەسەر خۆیاندا دابەش بكەن، وەك نوێنەرێكی كریستیانیش روونی دەكاتەوە، بڕیارە لە ژمارەیەك شارۆچكەی كریستیاننشین زەوی بەسەر ئەندامانی حەشدی شەعبیدا دابەش بكرێت.

وەحیدە یاقوو، پەرلەمانتاری پێشووی كریستیان لە پەرلەمانی كوردستان ده‌ڵێت: "دوای ئازادكردنی مووسڵ لە تیرۆریستانی داعش، پڕۆسەی بەعەرەبكردنی ناوچە كریستیانەكان دەستی پێكردووە و لە ھەموو سنووری دەشتی نەینەوا زێدەڕۆیی كراوەتە سەر زەویوزاری ھاووڵاتیانی كریستیان و ھەرچی سەروەت و سامانیش ھەیە بەتاڵان بردراوە".

ئەو نوێنەرەی كریستیانەكان، بۆ ماڵپەڕی فەرمیی پارتی دیموكراتی كوردستان گوتی: "پێشتر زەوییەكی زۆری كریستیان لە ناوچەی دەشتی نەینەوا داگیر كرابوو، بەڵام ئێستا گرووپەكانی حەشدی شەعبی پیلانێكی دیكەشیان لە بەردەستە و خەریكی جێبەجێكردنین، ئەویش دابەشكردنی زەوییە لەو شارۆچكانەی كریستیاننشینن، وەك بەرتلە و حەمدانیە، كە بەسەر چەكدارانی عەرەبی نێو ریزەكانی حەشدی شەعبیدا زەوییەكان دابەش دەكەن و ئەوەش بووەتە ھۆی دڵگرانیی زۆری كریستیانەكان".

یاقوو ئاماژەی بۆ ئەوە كرد: "پڕۆسەی بەعەرەبكردن و بەشیعەكردنی ناوچەی دەشتی نەینەوا زۆر بە رێكخراوی بەڕێوە دەچێت، بە شێوەیەك ھەر ئەندامێكی حەشد زەویی كریستیانەكانی داگیر كردبێت، لە فەرمانگەی باری شارستانی شوێنی لەدایكبوون و نیشتەجێبوونی گۆڕدراوە، بۆ نموونە چەكداری حەشد هەیە لە ناوچەكانی خوارووی عێراقەوە ھاتووتە مووسڵ، بەڵام دەستكاریی بەڵگەنامەی باری شارستانیی ئەو چەكدارە كراوە و خراوەتە سەر دەشتی نەینەوا و مووسڵ".

یاقوو، زانیارییەكی دیكەشی ئاشكرا كرد لەبارەی داگیركردنی زەویی كریستیانەكان و دەڵێت: "ئێستا بۆمان دەركەوتووە لە فەرمانگەی تاپۆ دەستكاریی بەڵگەنامەی تاپۆی ژمارەیەكی زۆری خانوو و زەویی كریستیانەكان كراوە و موڵكەكانیان خراوەتە سەر ناوی خەڵكی دیكە، ئەوەش ستەمێكی گەورەیە لە ئێمە دەكرێت".
KDP-