ئەمڕۆ جارێكی تر فڕۆكە جەنگییەكانی توركیا دەڤەری برادۆستیان لە سنووری شارۆچكەی سیدەكان بۆردوومان كرد، موختارێكی ناوچەكەش دەڵێ، بۆردوومانەكە زیانی ژینگەیی بە كوێستانەكانی سنوورەكە گەیاندووە.

لەوبارەیەوە، جەلال عوزێر، موختاری گوندی خەلیفان، بۆ ماڵپەڕی فەرمیی پارتی دیموكراتی كوردستان گوتی، كاتژمێر ٦:٠٠ بۆ ٧:٣٠ خولەكی بەیانیی ئەمڕۆ یەكشەممە، فڕۆكە جەنگییەكانی توركیا ھەریەك لە خواكوڕك و بێسنۆك و مارەمەلایان كردە ئامانج، كە ناوچەی كوێستانین و بە هۆی بۆردوومانەوە زیان بەر ژینگەی سنوورەكە كەوتووە.

موختاری گوندی خەلیفان گوتیشی: "تا پێشنیوەڕۆ فڕۆكە جەنگییەكانی توركیا بەردەوام بەسەر ئاسمانی سنوورەكەماندا دەسووڕانەوە".

شایەنی باسە، سیدەكان لە ڕووی ئیدارییەوە سەر بە شارۆچكەی سۆرانە لە سنووری پارێزگای ھەولێر و ١٤٤ كیلۆمەتر لە پایتەختەوە دوورە، بە ھۆی بەردەوامیی بۆردوومان و تۆپبارانی وڵاتانی دراوسێوە، ١٥٠ گوندی ئەو سنوورە ئاوەدان نەكراونەتەوە
KDP-