بڕیارە لە شاری ھەولێری پایتەختی ھەرێمی کوردستان کۆنفڕانسێک لە نێوان وەبەرھێنەران و بازرگانی ھەرێم و تورکیا بەڕێوە بچێت و بەرپرسێکی ژووری پیشەسازیش ئاشکرای کرد، وەبەرھێنەر و بازرگانانی تورکیا کارگە و کارەکانیان دەگوازنەوە بۆ ھەرێمی کوردستان.

حەمید ڕەبەتکی، سەرۆکی ژووری پیشەسازیی دھۆک بە ماڵپەڕی فەرمیی پارتی دیموکراتی کوردستانی ڕاگەیاند: "لە ڕۆژانی ڕابردوو شاندێکی بازرگانانیی ھەرێمی کوردستان سەردانی زۆربەی شارەکانی باکووری کوردستانی کرد و ھەموو پارێزگاکانی تورکیا بڕیاریان داوە لە ئایندەیەکی نزیکدا کۆمپانیا و کارگەکانیان دێنن بۆ ھەرێمی کوردستان تا بەشدار بن لە ھەستانەوەی ھەرێمی کوردستان لە ڕووی بازرگانی و وەبەرھێنانەوە، بەڵام ئەوان چاوەڕێن جووڵەی زیاتر بکەوێتە بازاڕەوە، چونکە بەھۆی لادانی بڕیاری پاشەکەوتی مووچەوە پێشبینیی گەشەیەکی زۆری بازرگانی و ئابووری دەکرێت."

سەرۆکی ژۆری پیشەسازیی پارێزگای دھۆک گوتیشی: "وڵاتی تورکیا لە ڕووی دامەزراندنی کارگەوە پێشکەوتووە و زۆر لەپێش وڵاتانی ئەورووپاشە، لەبەر ئەوە، ئێمە دەتوانین سوود لە ئەزموونی تورکیا وەربگرین وەک وڵاتێکی دراوسێ کە لە بازرگانی و پیشەسازیدا پێشکەوتووە."

حەمید ڕەبەتکی ڕوونی کردەوە: "بڕیارە لە ئایندەیەکی نزیکدا لە شاری ھەولێر کۆنفرانسێکی گرینگ لە نێوان بازرگان و وەبەرھێنەرانی تورکیا و ھەرێمی کوردستان بەڕێوە بچێت و لەو کۆنفرانسەدا بەرچاوڕوونی و پلان بۆ کارکردن و بەشداریی وەبەرھێنەرانی تورکیا دابنرێت، تا لە ھەرێمی کوردستان دەست بەکار بکەن و بەشدار بن لە ئاوەدانکردنەوەی کوردستان."
kdp-