بە گوتەی بەڕیوەبەری ناحیەی "قەیرەوان"ی سەر بە قەزای شنگال، ئەمڕۆ یەکشەممە 2019.3.24 سێ چەکداری داعش ویستوویانە خۆیان بگەیەننە ناو گوندی "سیبا عەماش" لە قوبلەی چیای شنگال کە لە نێوان ئەوان و هێزە عێراقییەکاندا شەڕ ڕووی داوە.


لەمبارەوە عەبدولحەمید قاسم، بەڕێوەبەری ناحیەی قەیرەوان ڕایگەیاند: "خەڵکی گوندی "سیبا عەماش" لە قوبلەی چیای شنگال بە دووریی 30 کیلۆمەتر، هێشتا نەگەڕاونەتەوە شوێنی ژیانی خۆیان و بەجێیان هێشتوون، چەند چەکدارێکی ترۆریستی داعش ویستوویانە ئەو هەلەیان قۆستووتەوە و ئەو خانوانەیان بۆ خۆیان بەکار هێناوە و تێیدا خۆیان حەشار داوە".


گوتیشی: "دوای ئەوەی لەلایەن هەندێک لە هاووڵاتییانەوە زانیاری دراوەتە هیزە عێراقییەکان کە تیرۆریستانی داعش لەناو خانووە چۆڵەکانی گوندی "سیبا عەماش" خۆیان حەشار داوە، هێرشیان کردووەتە سەریان و لە ئەنجامدا شەڕی رووی داوە".

بەڕێوەبەری ناحیەی قەیرەوان ڕاشی گەیاندووە پاش شەڕ و پێکدادان ئەو سێ چەکدارەی داعش لەناو خانووە چۆڵەکان لەلایەن هێزە عێراقییەکانەوە کوژراون و ناوچەکەش پاک کراوەتەوە.












باسنیوز