"تا ئێستا ١٠٣ کەس لە ڕووداوەکەی مووسڵ بێسەروشوێنن"
ھاشم بریفکانی، سەرۆکی لیژنەی ئەمنی لە ئەنجوومەنی پارێزگای نەینەوا دەڵێ، "بەپێی دوان ئامار زیاتر لە ١٠٠ کەس بەھۆی رووداوەکەی ناوچەی جەزیرەی مووسڵ گیانیان لەدەستداوە و ١٠٣ ھاوڵاتیش تا ئێستا بێسەروشوێنن، کە بەشێک لە قوربانیەکان کوردن.
سەرۆکی لیژنەی ئەمنی لە ئەنجوومەنی پارێزگای نەینەوا بۆ ماڵپەڕی فەرمیی پارتی دیموکراتی کوردستان دەڵێت، "دوێنێ ئەنجوومەنی پارێزگا کۆبونەوەیەکی بەپەلەی ئەنجامدا و تێدا ژمارەیەک بڕیار دەرکران، لەوانە لادانی بەڕێوەبەری گشتی تەندروستی نەینەوا و وەرگرتنەوەی مۆڵەتی وەبەرھێنان لە وەبەرھێنەرەکە، ھەروەھا وەبەرھێنەر و دەستەی کارگێڕی کۆمەڵگەی گەشتیاری جەزیرە رەوانە دادگا کراون بۆ لێکۆڵینەوە.
بریفکانی ئاماژەی بۆ ئەوەکرد، "ئێمە بەڕێوەبەری بەنداوی مووسڵ و بەڕێوبەرانی گەشتوگوزار و پۆلیسمان بانگھێشت کردووە لە ئەنجامی لێکۆڵینەوە دەرکەوتووە کەمتەرخەمی کراوە، چونکە بەڕێوەبەری بەنداوەکە گوتی ھۆشداریمان داوە لە بەرزبونەوەی ئاستی ئاوی رۆباری دیجلە و بەڕێوەبەری پۆلیسیش رۆژی ١٩ی مانگ نووسراوی ئاراستەی کۆمەڵگەی جەزیرە کردووە نابێت کۆمەڵگەکە بەڕووی ھاوڵاتیاندا بکرێتەوە بەھۆی مەترسی بەرزبونەوەی ئاستی ئاوی دیجلە، بەڵام بەداخەوە گوێیان پێنەداوە و ئەوە روویدا کە ھەموومان بینیمان.
پێوەست بە لادانی پارێزگاری نەینەوا ھاشم بریفکانی روونی کردەوە، "ئەنجوومەنی پارێزگا نەوفەل حەمادی پارێزگاری نەینەوای رەوانەی لیژنەی لێکۆڵینەوە کردووە لە بەغدا تا لێپرسینەوەی لەگەڵدا بکرێت و عادل عەبدولمەھدی سەرۆکوەزیرانی عێراقیش نامەیەکی ئاراستەی پەرلەمان کردوە بۆ وەرگرتنەوەی متمانە لە پارێزگاری نەینەوا، ھەروەھا لە ئەنجوومەنی پارێزگاش ئیمزا بۆ لادانی پارێزگاری نەینەوا کۆکراوەتەوە.
kdp-
