سەرجەم چەپەکانی کوردستنان لە شاری ھەولێر کۆ دەبنەوە و ئەندامێکی مەکتەبی سیاسیی حزبی شیووعی کوردستانیش دەڵێت گفتوگۆمان لەسەر دوو خاڵ کرد کە دەبێت لە داھاتوودا کاری لەسەر بکەین.



حزبی شیوعی کوردستان، حزبی زەحمەتکێشانی کوردستان، حزبی کۆمۆنیستی کرێکاری کوردستان، رێکخراوی بەدیلی کۆمۆنیستی، بزوتنەوەی دیموکراتی گەلی کوردستان و چەندین کەسایەتی و نووسەر و مامۆستای زانکۆ و ھەڵسووڕاوی چەپ و کۆمۆنیست دوێنێ لە شاری ھەولێر کۆبوونەوە، بەپێی زانیارییەکان چەپەکان بەنیازن لە سەرەتادا کاری ھاوبەش بە یەکەوە بکەن و بۆ ھەڵبژاردنی داھاتووی کوردستان بە یەک بەرە کاری خۆیان بکەن.



(ئەبوو کاروان)، ئەندامی مەکتەبی سیاسی حزبی شیووعی کوردستان، لەمبارەوە بۆ (باسنیوز) گوتی: "کۆبوونەوەیەکی فراوانی چەپەکانی کوردستان بوو و قسەمان لەسەر پرسە ھاوبەشەکان بوو بۆ کۆبوونەوەی داھاتووش دەبێت دوو خاڵ باس بکرێت، یەکەم: ئیدامە بە کۆبوونەوەی چەپەکان بدرێت و بەردەوامییان ھەبێت، دووەم پرسە گرنگەکانی کوردستان کۆمان بکاتەوە وەک گوزەرانی خەڵک و چینی فەقیر و کرێکاران".



ئەوەشی خستە ڕوو، ئەو دۆسییانەی پەیوەندییان بە گوزەرانی خەڵکەوە ھەیە، باس کران و بەردەوام کاری ھاوبەشمان ھەیە و ئەمجارەش کارمان کردوو کە کەسایەتییە چەپەکانیش بەشداری پێ بکەین.




باسنیوز