ڕاوێژكارێكی سەرۆك بارزانی دەڵێت، چوار ساڵی رابردووی حوكمڕانیی ھەرێمی كوردستان، بە یەكێك لە قۆناغە سەخت و چارەنووسسازەكانی گەلی كوردستان ھەژمار دەكرێت، كە لەسەر ئاستی ناوخۆ و دەرەوە ڕووبەڕووی گەورەترین مەترسی بووەوە لە رووی سیاسی و ئەمنی و ئابوورییەوە، بەڵام بە لێھاتوویی و سیاسەتی حەكیمانەی سەرۆك بارزانی، گەل و خاكی ھەرێمی كوردستان پارێزراو بوون.
 
ڕاوێژكاری سەرۆك بارزانی، مەسعوود حەیدەر، بۆ ماڵپەڕی فەرمیی پارتی دیموكراتی كوردستان رایگەیاند: "گەلی كوردستان لەو چەند ساڵەی رابردوودا بەرگەی ناخۆشترین قۆناغی ژیانی گرت و خۆی نەچەماندەوە، وەك نوێنەری كورد و ئەندامی لیژنەی دارایی پەرلەمانی عێراق كە ئاگاداری وەردەكارییەكانم، بنەمای خۆڕاگری ھەرێم لە سەركردایەتیی سەرۆك بارزانی و ئیرادەی گەلی كوردستان و لێھاتوویی سەرۆكی حكوومەت نێچیرڤان بارزانی و تیمی حكوومەتەكەی سەرچاوەی گرتبوو، كە مەلەفی ئابوورییان بەدەستەوە بوو، كە بێگومان دەسپێكی چارەسەری كێشەی دارایی ھەرێم، لە سەردانەكەی سەرۆك بارزانیدا بوو بۆ بەغدا."
 
حەیدەر ئەوەشی خستە ڕوو: "سەبارەت بە داھاتووی حكوومەتی ھەرێمی كوردستان، تەواوكاریی حكوومەتی پێشوو دەبێت و دەسپێكی قۆناغێكی تر دەبێت لە یەكڕیزیی ناوماڵی كورد و بووژانەوەی ئابووری و بنیاتنان و خۆشگوزەرانیی گەلی كوردستان، قۆناغی سەقامگیریی سیاسی و ئەمنی و  گەشەی ئابووری و بەھێزبوونی كورد لە بەغدا و یەكھەڵوێستیی فراكسیۆنە كوردستانییەكانی بەغدا دەبێت، لە چوار ساڵی داھاتوودا، كاروانی بنیاتنان و گەشەی ئابووری و خزمەتگوزاری دەست پێدەكات".
 
ناوبراو گوتیشی: "بە سەركردایەتیی سەرۆكی كابینەی داھاتووی حكوومەت كاك مەسروور بارزانی و بە ھاوكاریی ھێزە سیاسی و بەشداربووەكانی حكوومەت و پشتیوانیی گەلی كوردستان، لابردنی پاشەكەوتی مووچە یەكەم ھەنگاوی ئەو قۆناغەیە كە سەرۆك بارزانی دەرگا داخراوەكانی بۆی واڵا كرد."
kdp-