درۆژا جیهانیا ئافرەتێ دا لژێر دروشمێ (هەڤسەنگى ژپێخەمەت ژیانەکا باشتر)، ئافرەت دخوازن ماف و ئەركێن ئافرەت و زەلامان د دیارکرى بن و ئافرەتێن کوردێن ئیزیدى یێن ددەستێ تیرۆرستێن داعشێدا بهێنە ئازادکرن.
سالانە رۆژا جیهانیا ئافرەتان ل 8ى هەیڤا 3ێ دئێتە ساخکرن لسەرانسەرى جیهانێ، هەرێما کوردستانێ ژى هەمان رۆژ ساخ دکەتەڤە وەک رێزگرتنەک ل ئافرەتێن پیشەنگێن ڤى وەلاتى، ئەڤ سالە ژى ئەڤ بیرەوەریە لژێر دروشمێ (هەڤسەنگى ژپێخەمەت ژیانەکا باشتر) هاتیە بیرئینان، بۆ ڤێ مەرەمێ د. ڤیان سلیمان سکرتێرا ئێکەتیا ئافرەتێن کوردستانێ بۆ مالپەرێ فەرمیێ پارتى دیموکراتى کوردستان گۆت:" هەر دەم ئافرەتا کورد پێشەنگ بوویە بۆ ئاڤاکرنا جڤاکەکێ ساخلەم و هەڤسەنگیا خۆ بەرامبەرى هەر کاودانەکێ راگریتیە و پشکدارى شۆرەشان بوویە ب چەك و هزر و بیرێن خوڤە".

د.ڤیان سلیمان خویاکر:" مە پرۆژەیێ یاسایى ب ناڤێ (ماف و ئەركێن هەڤژینان) پێشکێشى پەرلەمانێ کوردستانێ کریە داکو هەڤژین ب یاسا سەرەدەریێ دگەل هەڤدوو بکەن و ماف و ئەرکێن هەر دوو لایا دپاراستى بن".

شەیما مستەفا، ئەنداما مەکتەبا سکرتاریەتا ئێکەتیا ئافرەتێن کوردستانێ بۆ مالپەرێ فەرمیێ پارتى دیموکراتى کوردستان ئاخفت:" ل 8 مارس هاتن و چوون ب پاسان بۆ ئافرەتان بێ بەرامبەرە ل دهۆک و هەولێرێ، دهەمان دەمدا چەندین دروشم بشێوەیێ پۆستەر ب پاسان ڤە هاتینە هەلاویستن".
ئافرەتێن کوردستانێ هەلویستێ خو بەرامبەر نەمرۆڤایەتیا تیرۆرستێن داعشێ هەبوویە، شەیما مستەفا زەلالکر:" ژ نەتەوەیێن ئێکگرتى دخوازین ئەو ئافرەتێن کوردێن ئیزیدى یێن دەستێ داعشێ دا بهێنە ئازادکرن و وێ توندیێ لبەرامبەر ئافرەتێن ئیزیدى ل باغوزێ دئێنەکرن بهێتە راوستاندن".

زەرى نەوزاد، بەرپرسا ئەنجوومەنێ ئێکەتیا ئافرەتان ل دهۆکێ بۆ مالپەرێ فەرمیێ پارتى دیموکراتى کوردستان دیارکر:" گەلەک مانشێت ب ناڤ و مافێن ئافرەتێ هاتینە گۆتن بوویە ئەگەرێ پەیدا بوونا دژایەتیێ دناڤبەرا هەر دوو رەگەزاندا، ژبەر هندێ گرنگە سالانە پلانێن دارێژتى بۆ ماف و ئەرکێن ئافرەتێ بهێنە نڤیسین لگور گهورین و پێشکەفتنا جڤاکى".

هەیفا دوسکى، چالاکڤان دبوارێ پێشئێخستنا ئافرەتێ دا بۆ مالپەرێ فەرمیێ پارتى دیموکراتى کوردستان بەحسکر، یاخویایە ئافرەتێ دناڤ جڤاکێ کوردیدا رۆلەکێ بەرچاڤ هەیە دهەمى بوارندا، بەلێ گرنگە پتر پیتە ب مافێن وێ یێن یاسایى و ئابورى و جڤاکى بهێتەدان، ژبەر کۆ ئافرەتا کوردستانێ هێزەکا تایبەت هەبوویە و تا نوکە ژى بەرامبەر هەمى کاودانێن نەخوش خوراگرتیە و پشکدارى هەمى ئازارێن سیاسى و جڤاکى یێن کوردستانێ بوویە و هەمى رۆژێن مە بلا 8ى ئادارێ بن.

kdp -