ئەمڕۆ پێنجشەممە 7ـی 3ـی 2019 لە سەلاحەددین سەرۆك بارزانی پێشوازی لە شاندێكی حكوومەتی شانشینی ئوردون كرد كە پێكهاتبوو لە د. تارق ئەلحموری وەزیری پیشەسازی و بازرگانی و مەنتەسەر عەقلە باڵیۆزی ئوردون لە عێراق و هەیسەم ئەبولفول كونسوڵی شانشینی ئۆردۆن لە هەولێر و ژمارەیەك ڕاوێژكاری باڵیۆزخانەی ئوردون لە عێراق.


لە دیدارەكەدا وەزیری پیشەسازی و بازرگانیی ئوردون سڵاوی شا عەبدوڵڵا پادشای ئوردون بە سەرۆك بارزانی گەیاند و وێڕای ئاماژەدان بە پەیوەندییە مێژووییەكانی نێوان هەردوولا جەختی لە پەرەپێدانی پەیوەندییەكانی نێوان هەرێمی كوردستان و شانشینی ئۆردون كردەوە، هەروەها پێزانینیشی هەبوو بۆ ئەو سەقامگیری و پێكەوەژیانەی لە كوردستاندا هەیە و بە هۆكاری پێشكەوتن و ئاییندەیەكی باشی لە قەڵەم دا.

لە بەرانبەردا سەرۆك بارزانی سوپاسی پادشای ئۆردونی كرد و بە دۆست و برای خۆی زانی، هەروەها پێزانینی هەبوو بۆ هەڵوێستەكانی پادشای ئۆردۆن لە بەرانبەر گەلی كوردستان.

هەر لەو كۆبوونەوەیەدا بارودۆخی سیاسیی عێراق و هەرێمی كوردستان و ڕووبەڕووبوونەوەی هزری توندڕۆیی و تیرۆر تاوتوێ كرا.

پەرەپێدانی پەیوەندییەكانی نێوان هەرێمی كوردستان و شانشینی ئوردون تەوەرێكی دیكەی ئەو دیدارە بوو.











باسنيوز