به‌رپرسێ راگه‌هاندنا پۆلیسێن پارێزگه‌ها دهۆكێ راگه‌هاند، پۆلیسێن دهۆكێ شیان 11 تاوانباران ل سه‌ر تاوانێن كۆشتنێ و دزیا و فێلبازی و سه‌خته‌كاریان ده‌سته‌سه‌ركرن و دان ب تاوانێن خوه‌ كرینه‌.

رائیدێ مافپه‌روه‌ر هێمن سلێمان ئه‌ترووشى، د كۆنگره‌یه‌كێ رۆژنامه‌ڤانى دا دیار كر، پۆلیسێن پارێزگه‌ها دهۆكێ شیان 11 تاوانباران ده‌سته‌سه‌ركرن كو دوو ژ وان ل قه‌زا زاخۆ بوون، پشتى وان هه‌ردوو تاوانباران ل زاخۆ هێرش كریه‌ سه‌ر ماله‌كێ و گه‌فێن كۆشتنێ لێ كربوون و گۆتبوو وان ئه‌گه‌ر د ماوێ 48 ده‌مژمێران دا 30 ده‌فته‌رێن دۆلارى نه‌ئینیت دێ كچا وان كۆژن، به‌لێ پشتى پۆلیسێن نه‌هێلانا گونه‌هباریان ل زاخۆ دووڤچوون ل سه‌ر كرى، شیان وان دوو تاوانباران ده‌سته‌سه‌ربكه‌ن و هاتنه‌ ره‌وانه‌كرن بۆ دادگه‌ها ڤه‌كۆلینێ.

زێده‌تر دبێژیت: "پشتى رێڤه‌به‌ریا پۆلیسێن دهۆكێ ژلایێ رێڤه‌به‌ریا پۆلیسێن سلێمانیێ ڤه‌ هاتیه‌ ئاگه‌هداركرن ل دور ره‌ڤینا بكۆژه‌كى ژ سلێمانیێ بۆ دهۆكێ، مه‌ دووڤچوون ل سه‌ر كر و پۆلیسێن قه‌زا ئاكرێ شیان وى بكۆژى ل سه‌نته‌رێ قه‌زا ئاكرێ ده‌سته‌سه‌ربكه‌ن و ڤى تاوانبارى ژبلى كۆشتنا كه‌سه‌كى، حه‌فت كه‌یسێن دى یێن دزیێ و فێلبازیێ ل سه‌ر وى هاتبوونه‌ تۆماركرن و هاته‌ ره‌وانه‌كرن بۆ دادگه‌ها سلێمانیێ بۆ ڤه‌كۆلینێ".

رائیدێ مافپه‌روه‌ر هێمن سلێمان ئه‌ترووشى ئه‌و یه‌ك ژى دیار كر، كو رێڤه‌به‌ریا پۆلیسێن دهۆكێ شیان چوار تاوانباره‌كان ل قه‌زا به‌رده‌ره‌ش ب تومه‌تا سه‌خته‌كاریێ ل دهۆك و شێخان و به‌ره‌رده‌ش ل گه‌ل 131 وه‌ره‌قێن دۆلارێ سه‌خته‌ ده‌سته‌سه‌ركرن، هه‌روه‌سا ل قه‌زا سێمێلێ ژى دوو تۆمه‌تباران فێل ل هاوولاتیان كر و پاره‌ ژ خه‌لكى وه‌ردگرتن و سۆز ددا گه‌نجان وان ل كۆمپانیه‌كا پترۆلێ ب دامه‌زرینن و ئه‌و كۆمپانیا یا وه‌همى بوو و تاوانبار هاتنه‌ ده‌سته‌سه‌ركرن.

به‌رپرسێ راگه‌هاندنا پۆلیسێن پارێزگه‌ها دهۆكێ ئاشكرا ژى كر، كو ل قه‌زا ئامێدیێ گه‌نجه‌كێ سه‌ته‌لایتێن خه‌لكى چێدكرن و د چوو د ناڤ مالان دا و شاره‌زایى وه‌ردگرت و پشتى هینگى د چوو دزیا وان مالا و چوار دزیێن مه‌زن ژى ل ئامێدیێ كرینه‌، به‌لێ پۆلیس شیان وى ده‌سته‌سه‌ربكه‌ن و ڤى تاوانبارى دان ب تاوانێن خوه‌ كرینه‌ و د ڤان دزیا دا زێده‌تر ژ 5 ده‌فته‌رێن دۆلارى و زێرى ژ وان مالان دزینه‌.









باسنيوز