بە بۆنەی ٢٨ ساڵەی یادی ڕاپەڕینی جەماوەریی ئازاری١٩٩١ی لە باشووری کوردستان، ئەنجومەنی وەزیرانی حکوومەتی هەرێمی کوردستان پەیامێکی بڵاو کردەوە.



لە بەشێک لە پەیامەکەی ئەنجومەنی وەزیرانی حکوومەتی ھەرێمی کوردستاندا ھاتووە: "ڕاپەڕین بە یەکڕیزی و یەکگرتوویی لایەنە سیاسییەکان و سەرجەم پێکھاتە و چین و توێژەکانی، گەورەترین سەرکەوتنی مێژوویی بۆ گەلەکەمان تۆمار کرد. ھەر بەو یەکڕیزی و گیانی خۆڕاگرییە بوو کە لە پاش ڕاپەڕینەوە تا ئێستا ھەرێمی کوردستان چەندین پیلانی شەڕانگێزانەی تیرۆریستان و ناحەزانی لە گۆڕ ناوە و چەندین ئاستەنگ و قەیرانی نەخوازراوی بە سەرکەوتوویی تێپەڕاندووە".

دەقی پەیامەکە بەم چەشنەیە:



جەماوەری سەربەرز و خۆڕاگری کوردستان،



ئەمڕۆ بیست و ھەشت ساڵ بەسەر ڕاپەڕینە مەزنەکەی ئازاری ١٩٩١دا تێدەپەڕێت. بەم بۆنە شکۆدارەوە گەرمترین پیرۆزبایی لە خانەوادەی سەربەرزی شەھیدان و پێشمەرگە قارەمانەکان و سەرجەم کوردستانیانی ئازیز بە ھەموو پێکھاتە نەتەوەیی و ئاینییەکانییەوە لە ناوخۆ و دەرەوەی کوردستان دەکەین.



ڕاپەڕین کە دەنگ و ئیرادەی گەلی کوردستان بوو بۆ ڕەتکردنەوەی ستەم و خۆسەپاندن بەسەر خواست و چارەنووسیدا، بە قوربانیدان و ماندووبوونی گەل و بە یەکڕیزی و یەکگرتوویی لایەنە سیاسییەکان و سەرجەم پێکھاتە و چین و توێژەکانی، گەورەترین سەرکەوتنی مێژوویی بۆ گەلەکەمان تۆمار کرد. ھەر بەو یەکڕیزی و گیانی خۆڕاگرییە بوو کە لە پاش ڕاپەڕینەوە تا ئێستا ھەرێمی کوردستان چەندین پیلانی شەڕانگێزانەی تیرۆریستان و ناحەزانی لە گۆڕ ناوە و چەندین ئاستەنگ و قەیرانی نەخوازراوی بە سەرکەوتوویی تێپەڕاندووە.



کوردستانیانی ئازیز،



خەبات و خۆراگریی ئێوە بۆ ھێنانەدیی ژیانێکی ئازاد و سەربەرزانە و دنیایەکی شارستانیی پڕ لە ئارامی و لێبوردەیی و ئاشتی و خۆشگوزەرانی بووە. ژیانێک کە شایانی مێژووی دێرینی قوربانیدان و ماندووبوونی گەلە ستەمدیدەکەمان بێت لە قۆناغە جیاکانی خەبات و تێکۆشانی ئاشتیخوازانەیدا. خواستە ڕەوا و دەستوورییەکانی ھەرێمی کوردستان لە عێراقی فیدراڵدا مافی سروشتی و دادپەروەرانەی خۆیەتی. عێراقێکی سەقامگیر و گەلێکی خۆشگوزەران زادەی سیستمێکی تەندروستی دیموکراسی و فیدراڵییە کە تیایدا دەستوور ڕێزلێگیراو بێت و ھاوبەشیی ڕاستەقینە و مافی ڕەوای ھەموو پێکھاتەکانی تێدا فەراھەم بێت.



کوردستانیانی خۆشەویست،



حکوومەتی ھەرێمی کوردستان زادەی ئیرادەی نیشتیمانیی گەلی کوردستانە بە ھەموو پێکھاتە نەتەوەیی و ئایینییەکانییەوە و یەکێکە لە دەسکەوتە بەھادارەکانی ڕاپەڕین، پاراستن و پتەوکردنیشی ئەرک و بەرپرسیارییەتیی سەرجەم لایەن و چین و توێژەکانی گەلەکەمانە. ئەم ئەرکە ئەمڕۆ لە ھەر کاتێک زیاتر لێکگەیشتن و تەبایی و یەکڕیزیی زیاتر لە ھەموو لایەنە کوردستانییەکان دەخوازێت.



دڵنیاین ھیممەتی دڵسۆزانە و ھەستی بەرپرسیارییەتیی لایەنەکان لە ئاستی ئەم ئەرکە مێژووییەدا دەبن بۆ پاراستنی دەستکەوتەکانی ڕاپەڕین و پتەوترکردنی بنەما و پایەکانی کوردستانێکی بەھێز، وەک وەفایەک بۆ خوێنی شەھیدە قارەمانەکان و مێژووی پڕ لە قوربانی و سەروەریی گەلەکەمان و لەپێناو سەقامگیری، گەشەپێدانی ھەرێمی کوردستان، ژیانێکی سەربەرزانە، خۆشگوزەرانی، بەدەستھێنان و پاراستنی مافەکان بۆ کوردستانیان و ئایندەیەکی گەش بۆ ھەموو پێکھاتەکانی کوردستان و نەوەکانی داھاتوومان.



بەرز و شکۆدار بێت ساڵیادی ڕاپەڕینی مەزنی ئازاری ١٩٩١.

دروود بۆ گیانی پاکی شەھیدانی ڕاپەڕین و سەرجەم شەھیدانی کوردستان.





ئەنجومەنی وەزیرانی ھەرێمی کوردستان

٥/٣/٢٠١٩