نێزیكی شەش سالانە قەزا شنگالێ‌ ژ بودجەیا عیراقێ‌ هاتیە بێبەهركرن و چو نیەت نینن بودجەیا شنگال یا ڤان شەش سالان بهێتە قەرەبووكرن و ئەڤ سالە ژی چو نیشانێن هندێ‌ نینن بۆدجەیەك بۆ شنگالێ‌ بهێتە تەرخانكرن.

مەحما خەلیل، قائیمقامێ‌ قەزا شنگالێ‌ دیار كر، ژ سالا 2013 وەرە و هەتا نها، حكومەتا عیراقێ‌ چو پارە و بۆدجە بۆ قەزا شنگالێ‌ ژلایێ‌ عیراقێ‌ ڤە نەهاتیە تەرخانكرن و دابینكرن، سەرەرای هندێ‌ ژ سالا 2014 وەرە شنگال 85% یا وێرانە و پشتگوه هاڤێتیە و خوە ناڤێ‌ شنگالێ‌ ژی د بۆجەیێ‌ دا نەهاتیە، هەما وەكو وەفاداری بۆ خوینا شەهیدێن شنگال و ئاوارەبوونا خەلكێ‌ وێ‌ و رەڤاندنا شەش هزار ئێزدیێن شنگالێ‌، بلا عیراقێ‌ ب تنێ‌ ناڤێ‌ شنگال كربایە د بۆدجەیا سالا 2019 دا، بلا خوە فلسەك تەرخان نەكربایە.

د ماوێ‌ چوار سالێن سەردەمێ‌ داعشێ‌ مووسل كۆنترۆلكری، زێدەتری 14 ملیار دینار وەكو بودجەیا پارێزگەها نەینەوا هاتینە تەرخانكرن، لێ‌ خوە فلسەك ژی بۆ شنگال نەهاتیە تەرخانكرن و مەزاختن و د سالا بۆری یا 2018 ژی دا بۆدجەیا پارێزگەها نەینەوا 180 ملیار دینار بووینە و د بۆدجەیا ئەڤ سالە ی 2019 ژی دا 184 ملیار دینار بۆ مووسل هاتینە تەرخانكرن و چو بەحسێ‌ ئاڤەدانیا شنگال نەهاتیە كرن.











باسنيوز