هاریكاریێن عیراقێ بۆ ئاوارەیێن ل دهۆكێ بەرەڤ كێمبوونێ نە
سالم سەعید، بەرپرسێ راگەهاندنا بۆردێ كارۆبارێن مرۆڤایەتی ل پارێزگەها دهۆكێ، دیار كر كو بەری نها عیراقێ ب تنێ هندەك جاران سەلكێن ئاهێن خوارنێ ل سەر ئاوارەیێن ل دهۆكێ دژین بەلاڤدكرن، بەلێ ئەو هاریكاریە ژی بەرەڤ كێمبوونێ چووینە و عیراق چو خزمەتا ئاوارەیان ناكەت، ب تنێ حكومەتا هەرێمێ چاڤێ خوە ددەتە ئاوارەیان و پێداویستیێن ژیانێ بۆ وان دابین دكەت.
ئاشكرا ژی كر كو ل دەمێ ژ نوو ئاوارە و پەنابەر هاتینە پارێزگەها دهۆكێ، رێكخراوا جیهانیا خۆراكی (WFP) هەر ئاوارەیەكی نێزیكی 31 دۆلاران بۆ ئێك هەیڤ ددانێ، پشتی هینگی ئەو هاریكاریە ژی بەرەڤ كێمبوونی چوون و نها ئەو هاریكاریا ئاوارەیان ژی بۆ 17 هزار دیناران كێمتر لێ هاتیە و ئەو ژی نە بۆ هەیڤێ، بەلكو بۆ 45 رۆژان جارەكێ هەر ئاوارەیەك 17 هزار دیناران وەردگریت.
سالم سەعید ئەو یەك ژی نە ڤەشارت كو ئەڤ سالە رەوشا دابەشكرنا نەفتا سپی ل سەر ئاوارەیان ژلایێ عیراقێ ڤە گەلەك یا لاواز بوو و ببوو ئەگەر كو ئاوارە ژ سەرمایێ ب نالن.
ل پارێزگەها دهۆكێ نها 21 كەمپێن ئاوارەیان هەنە و 630 هزار ئاوارە و پەنابەر ل دهۆكێ دژین و رێژەیا هەرە مەزن یا ل دەرڤەی كەمپان دژین و ڤەگەریانا مالێن وان ژی گەلەك یا لاوازە و ژ بەر نەبوونا خزمەتگۆزاریان و لاوازیا بارێ ئەمنی، ئاوارە نەشێن ڤەگەرنە مالێن خوە.
باسنيوز
