بەرپرسی پەیوەندییەکانی دەرەوەی پارتی دیموکراتی کوردستان لەنێو پەرلەمانی کوردستانەوە بە ڕۆژنامەنووسانی ڕاگەیاند، هەرچەندە یەکێتی پێشوازی لە پەیامەکەی سەرۆک بارزانی کردووە و ئامادەیی بۆ کۆبوونەوە نیشان داوە، بەڵام هێشتا هەڵوێستی حزبەکە لەسەر کەرکووک ڕوون نییە.

هۆشیار سیوەیلی ئاماژەی بەوە کرد: ”یەکێتی پێشوازی لە پەیامەکەی سەرۆک بارزانی کردووە و لە وەڵامەکەی خۆیدا کۆسرەت ڕەسووڵ کە بۆ سەرۆک بارزانی ناردووە، ئامادەییان دەربڕیوە لە هەر کوێیەک پارتی بیەوێت، ئەوان دادەنیشن“.

لەبارەی کاندیدکردنی کەسێک بۆ پۆستی پارێزگاری کەرکووک، سیوەیلی ڕای گەیاند: ”یەکێتی لەوانەیە باسی چوار کاندیدیان کردبێت، لە دوا قسەیاندا هاتنەوە و باسی ناوێکیان کرد. هێشتا هەڵوێستی یەکێتی لەمەڕ کێشەکەی کەرکووک ڕوون نییە“.



دووپاتیشی کردەوە: ”ناکرێ کەسێک یان کەسانێک کە لە خیانەتی ١٦ی ئۆکتۆبەر بەشدار بووبن، ناکرێ بچنەوە کەرکووک و کاربەدەست بن. هەروەها ناکرێ کەرکووک کە لەلایەن حەشد داگیر کرابێ و ئیدارەی فیعلی لەدەست حەشد بێت، تۆ پارێزگارێکی کورد بۆ کەرکووک دابنێیت“.










باسنيوز