بەپێی نووسراوێكی وەزارەتی كاروكاروباری كۆمەڵایەتیی حكوومەتی هەرێمی كوردستان، كە كۆپییەكی ئەو نووسراوە ئاماژە بەوە كراوە، چۆن لەمەودوا مۆڵەتی بەخێوكەری کەمئەندام بدرێتە فەرمانبەران.

وەزارەتەكە جەختی كردووەتەوە، كە دەبێ لەمەودوا لە رێگەی ئەوانەوە مۆڵەتەكە بدرێت، هاتووە: "بە مەبەستی كەمكردنەوەی رۆتین بۆ ئەو فەرمانبەرانەی مۆڵەتی بەخێوكەر وەردەگرن و بۆ رێگەگرتن لە هەبوونی ژمارەیەكی زۆری ئەو مۆڵەتە، دەبێ داواكاریی مۆڵەتی بەخێوكەر ئاڕاستەی بەڕێوەبەرایەتییە گشتییەكانی سەر بە وەزارەتمان بكرێت".


وەزارەتی كاروكاروباری كۆمەڵایەتی پاش دیراسەتكردنی داواكارییەكان بەپێی رێنمایی وەزارەت و وەزارەتی دارایی بۆ وەزارەتی كاروكاروباری كۆمەڵایەتی بەرز دەكرێتەوە و بڕیاریان لەبارەوە دەدرێت.
سەرۆكایەتیی ئەنجومەنی وەزیرانی كوردستان بە نووسراوێك داوای لە هەموو وەزارەت و فەرمانگەكان كردووە، بۆ میكانیزمی پێشكەشكردنی مۆڵەتی بەخێوكەر كار بە نووسراوەكەی وەزارەتی كاروكاروباری كۆمەڵایەتی بكەن.

زیاتر 90 هەزار كەمئەندام و خاوەن پێداویستیی تایبەت لە هەرێمی كوردستان هەیە، كە بەشێك لەوانە پێویستیان بە دایك و باوك یان کەسی خێزانەکانیانە بۆ بەخێوكردنیان و خزمەتكردنیان.

د. رێكەوت حەمەڕەشید، وەزیری كاروكاروباری كۆمەڵایەتی بەوەكالەت رايگەیاند، دەیانەوێت ئەو مۆڵەتانەی بە ناوی بەخێوكەر دەدرێت، رێك بخرێنەوە.

ئاماژەی بەوەش دا، ئەو مۆڵەتە تەنیا لەلای ئەوان دەدرێت و لە وەزارەتەكان و دامودەزگاكانی تر نادرێت.

سەرچاوەیەكی ئاگادار رايگەیاند، پێشتر لە لایەن وەزیرەكان مۆڵەتی بەخێوكەر دراوە، گوتی: "بەپێی رێنمایی دارایی و نووسراوی سەرۆكایەتیی ئەنجومەنی وەزیران، ئەوەی كراوە پێوەندیی بە مۆڵەتی بەخێوكەری كەمئەندامەوە نەبووە".

بەپێی رێنماییەكان، فەرمانبەرێك بۆ بەخێوكردنی یەك كەمئەندام، مووچەكەی خۆی بۆ خەرج دەكرێت و سەرمووچەی ساڵانە و پلەبەرزكردنەوەشی بۆ دەكرێت، ئەگەر بۆ دوو كەمئەندام بێت، ئەوە مووچەیەكی تری بە كەمتر لە 150 هەزار دینار بۆ خەرج دەكرێت. جەختیش كراوەتەوە، هەر بەخێوكەرێك مووچە و مۆڵەتی پێ بدرێت و کار و ئەرکی خۆی جێبەجی نەکات، جگە لەوەی مووچەكەی دەبڕدرێت، سزایەكی داراییش دەدرێـت کە لەنێوان 500 هەزار تاوەكوو یەك ملیۆن دینارە.










باسنيوز