لە شاری پڕاگی پایتەختی وڵاتی چیک، فەلاح حەسەن، جێگری سەرۆکی لاوانی دیموکراتی جیھان و نوێنەری دەرەوەی یەکێتیی لاوانی دیموکراتی کوردستان بەشداریی کۆبوونەوەی سەرکردایەتیی لاوانی پارتی گەلانی ئەورووپا و کاندیدانی ئەو ڕێکخراوەی کرد کە بڕیارە بۆ خولی داھاتووی پەرلەمانی ئەورووپا لە ڕۆژی ٢٦ی ئایاری ئەمساڵ خۆیان ھەڵبژێرن.

لە کۆبوونەوەکەدا بەشێک لە کاندیدەکان دوای پێشکەشکردنی وتارەکانیان داوای پشتگیرییان لە لاوانی ئەورووپا کرد کە پاڵپشتییان بکەن لە ھەڵبژاردنەکانی داھاتووی پەرلەمانی ئەورووپا کە ئەمساڵ ئەنجام دەدرێت.

فەلاح حەسەن دەڵێت: "ئەم جۆرە کۆبوونەوە و پێگە سیاسییانە گرنگن بۆ ئایندەی ھەرێمی کوردستان، چونکە ئێمە وەکو گەلی کوردستان پێشتر لە سیاسەتی دووربین و بەرنامەی ستراتیژیی درێژخایەنی سیاسی سەرکەوتوو نەبووین، بۆیە لەمەودوا ھەوڵ دەدەین لاوانی سیاسیی کوردستانیش بەشێک لەم بۆشاییانە پڕ بکاتەوە."

شایانی باسە کۆبوونەوەی لاوانی پارتی گەلانی ئەورووپا لە ٢١ی شوبات تا ٢٤ی شوباتی ٢٠١٩ بە ئامادەبوونی لاوانی سیاسیی ٢٧ وڵاتی ئەورووپایی دەستی بە کارەکانی کرد.
kdp-