ھاتن و چوونا دھۆکێ قەدەغەیا شوفێریا تەکسیێ بۆ فەرمانبەران راگەھاند
موقەدم ئازاد تاھا، بەرپرسێ پشکا پەیوەندی و راگەھاندنا رێڤەبەریا ھاتن و چوونا پارێزگەھا دھۆکێ راگەھاند: "ل دیڤ نڤیسارا فەرمی یا وەزارەتا ناڤخۆی یا ھەرێما کوردستانێ کو نابیت ئێدی فەرمانبەرێن (ئەفسەر و کارمەندێن ھێزێن ناڤخۆ، ئاسایش ، پۆلیس، زێرەڤانی، پێشمەرگە ، ھاتن و چوونێ، پۆلیسێن پاسەوان و یێن گومرکان) دگەل ھەمی کارمەند و ھێزێن ناڤخۆی کارێ شوفێریا تەکسیێ بکەن".
گۆت ژی: "نابیت فەرمانبەرێ میری و حکومی و مامۆستا ژی ئەوی کاری ئەنجام بدەن. بتنێ ھندەک فەرمانبەر نەبن ئەوێن مۆچێن وان کێم بن دشێن وی کاری ئەنجام بدەن".
ناڤبری ئەو چەندە ژی گۆت: "کەسێن فەرمانبەر و خودان گرێَبەست بن دشێن کارێ شوفێریا تەکسیێ بکەن و ھاتن و چوونا دھوکێ ھەماھەنگیا پارێزگەھا دھوکێ چەندین داتا ھاتینە بەرھەڤکرن و دێ زانین کیش کەسە فەرمانبەر و کارێ شوفێریا تەکسیێ دکەت و دیسان شوفێرێن ئاسایی و فەرمانبەر نەبن دڤێت سەرەدانا مە بکەن ل دومیز و زاخۆ و ئامێدیێ و ئاکرێ و شێخان و سەنتەرێ دھوکێ ژی ل بنگەھێ ناڤ باژێرێ دڤێت سەرەدانێ بکەن تا کو مولەتا وێ چەندێ وەربگرن، ئێدی ئەو دشێن کارێ شوفێریا تەکسیێ بکەن و دێ ھندەک (باج) ھێنە دروستکرن و دێ ئەو باجە ل ناڤ ترۆمبێلێ دا بیت بۆ وی کەسی ئەو کەسێن فەرمانبەر نەبن و شوفێرێن تەکسیێ".
بەرپرسێ پشکا پەیوەندی و راگەھاندنا رێڤەبەریا ھاتن و چوونا پارێزگەھا دھۆکێ ئەو چەندە ژی دوپاتکر: "نابیت تەکسیەکێ دوو شوفێر و زێدەتر ھەبن واتە بتنێ کەسەک دێ تەکسیێ بکار ئینیت و ئەو کەسێن پێگریێ پێ نەکەت دێ ھێتە دەستەسەر کرن و ترۆمبێل ھێتە دەستەسەر کرن و ھەلبەت ئەگەر فەرمانبەر بیت دێ ب توندی ھێتە سزادان و وەک ھاریکاری مە بۆ خەلکێ خۆ کریە کو ھەر کەسەکێ حەز بکەت تەکسیا خۆ بکەتە تایبەت. مە ئەو دەرگەھە بۆ ڤەکریە و ئەم د خزمەتا شوفێرێن تەکسیان داینە و یێ پێگریێ ب رێنمایان نەکەت دێ ب توندی ھێتە سزادان".
باسنیوز
