زانكۆى هه‌ڵه‌بجه‌ له‌ هه‌ڵمه‌تێكی گه‌وره‌ى كۆكردنه‌وه‌ى 31 هه‌زار كتێبدا بۆ خاتری ڕۆحى پێنج هه‌زار شه‌هیدى كیمیابارانى هه‌ڵه‌بجه‌، له‌ ماوه‌ى 10 ڕۆژدا نزیكه‌ى 20 هه‌زار كتێبى كۆ كردووه‌ته‌وه‌ و بڕیاره‌ ڕێژه‌كه‌ى بۆ 31 هه‌زار كتێب بەرز بكاتەوە.

پرۆفیسۆرى یاریده‌ده‌ر دكتۆر ئیدریس كه‌ریم یاریده‌ده‌رى سه‌رۆكى زانكۆى هه‌ڵه‌بجه‌ بۆ كاروبارى كارگێڕى و دارایی و سه‌رپه‌رشتیارى هه‌ڵمه‌تى كتێب كۆكردنه‌وه‌كه‌، به‌ ماڵپه‌ڕى زانكۆى هه‌ڵه‌بجه‌ى ڕاگه‌یاندووه‌ كە زانكۆكە له‌ هه‌ڵمه‌تى گه‌وره‌ى كۆكردنه‌وه‌ى 31 هه‌زار كتێبدا بۆ ڕۆحى 5 هه‌زار شه‌هیدى كیمیابارانى هه‌ڵه‌بجه‌، توانیویه‌تى له‌ ماوه‌ى 10 ڕۆژى ڕابردوودا نزیكه‌ى 20 هه‌زار كتێب كۆبكاته‌وه‌.

ئاماژه‌ى به‌وه‌ش داوه‌ "كتێبه‌كان به‌گشتى له‌ شار و شارۆچكه‌كانى هه‌رێمى كوردستان كۆ كراونه‌ته‌وه‌ و دواتر ده‌هێنرێنه‌ كتێبخانه‌ى ناوه‌ندى زانكۆ و به‌رده‌وامیش ده‌بین له‌سه‌ر هه‌ڵمه‌ته‌كه‌ و ده‌مانه‌وێ به‌ هه‌زاران كتێبی دیكه‌ بۆ زانكۆى هه‌ڵه‌بجه‌ كۆبكه‌ینه‌وه‌".

زانكۆى هه‌ڵه‌بجه‌ له‌گه‌ڵ نزیكبوونه‌وه‌ى یادى كیمیابارانكردنى هه‌ڵه‌بجه‌دا له‌ سه‌ره‌تاى مانگى شوباته‌وه‌ هه‌ڵمه‌تێكى گه‌وره‌ى كتێب كۆكردنه‌وه‌ى له‌ژێر ناوى (سی و یه‌ك هه‌زار كتێب بۆ ڕۆحى پێنج هه‌زار شه‌هید) ڕاگه‌یاند.












باسنيوز