ماوەیەكە بەشێك لە بەرپرسانی كورد لە كەركووك باس لە پێكهێنانی هێزێكی چەكداری لەلایەن بەرەی توركمانییەوە لە كەركووك دەكەن و ئەندامێکی مەکتەبی سیاسیی بەرەی تورکمانیش دەلێت ئەو هەواڵانە پڕوپاگەندەن.

بەپێی زانیارییەكان ئێستا باسوخواسی پێكهێنانی ئەو هێزە چەكدارییەی بەرەی توركمانی لە كەركووك بووەتە رۆژەڤی حزبە سیاسییەكان، هەروەها بەشێك لە هاووڵاتیانیش و چاودێرانی دۆخی كەركووكیش پێیان وایە پێكهێنانی هێزی چەكداری تایبەت بە حزب نایاساییە.

لەم بارەیەوە، ئایدن مەعروف، ئەندامی مەكتەبی سیاسیی بەرەی توركمانی،ڕایگەیاند: "پێكهێنانی هێزی چەكداری لەلایەن بەرەی توركمانییەوە لە كەركووك پروپاگەندەیە و بەرەی توركمانی حزبێكی مەدەنییە، هەرچەندە توركمانەكان پێشتر داوایان لە حكوومەتی عێراق كردبوو كە هێزێكی چەكداری بێلایەن پێكبهێنرێت بۆ پاراستنی توركمانەكانی لە كەركووك".

سەبارەت بە حەشدی توركمانی لە كەركووك و خورماتوو، ئەو ئەندامەی مەكتەبی سیاسی بەرەی توركمانی، گوتی: "ئەو كەسانە بەشێكن لە حەشدی شەعبی و ئێستا لەناو حەشدی شەعبی حەشدی توركمانی و مەسیحی و شەبەكیش هەیە و ئەوانە دیارە لەدژی داعش دروست كراون و هەموویان لەناو دەستەی حەشدی شەعبیدان و لە ناوچەكانی خۆیان حزووریان هەیە، بەڵام هیچ پەیوەندییەكیان بە بەرەی توركمانییەوە نییە".











باسنیوز