پێنج حزب و لایەنی سیاسیی رۆژهەڵاتی کوردستان پرۆژە و هەڵوێستێکی کۆمەڵگەی دیموکراتیک و ئازادی رۆژهەڵاتی کوردستان (کۆدار)ی باڵی پارتی کرێکارانی کوردستان (پەکەکە) لەو بەشەی کوردستان، رەت دەکەنەوە.


لە کۆبوونەوەیەکدا، کە رۆژی سێشەممە 7/8/2018 لە بارەگای ناوەندیی سازمانی خەباتی کوردستانی ئێران ئەنجام درا، ناوەندی هاوکاریی حزبەکانی کوردستانی ئێران تاوتوێی رەوشی رۆژهەڵاتی کوردستان و دەرەنجامەکانی خۆپیشاندانەکانی ئێرانی کرد.


بەپێی میدیاکانی سەر بە حزبەکانی ناوەندی هاوکاری، لە کۆبوونەوەکەدا تاوتوێی پرسی ئابووریی رۆژهەڵاتی کوردستان و ئێران و کاریگەرییەکانی سەپاندنی سزاکان لەلایەن ئەمریکاوە بەسەر ئێران، کراوە.


نزیکەی 10 مانگە بەشێک لە هاووڵاتییانی ئێران دژی خراپیی باری ئابووری و سیاسەتەکانی حکوومەتی وڵاتەکەیان، بەردەوام خۆپیشاندان دەکەن.

هەر لەو کۆبوونەوەیەدا، ناوەندی هاوکاریی حزبەکانی کوردستانی ئێران هەڵویستی کۆداریان سەبارەت بە شەڕی چەکداریی دژی ئێران و دژایەتیی رووخاندنی کۆماری ئیسلامیی ئێران، رەت کردەوە.

پێشتر کۆدار دژایەتیی خۆی بۆ خەباتی چەکداری دژی کۆماری ئیسلامیی ئێران و هەر هەوڵێک بۆ رووخاندنی ئەو کۆمارە ئیسلامییە، راگەیاندبوو.


ناوەندی هاوکاریی حزبەکانی کوردستانی ئێران لە پێنج حزبی رۆژهەڵاتی کوردستان پێک دێت، کە بریتین لە؛


- حزبی دیموکراتی کوردستان (حدک)

- حزبی دیموکراتی کوردستانی ئێران (حدکا)

- کۆمەڵەی شۆڕشگێڕی زەحمەتکێشانی کوردستانی ئێران

- کۆمەڵەی زەحمەتکێشانی کوردستان

- سازمانی خەباتی کوردستانی ئێران


دۆناڵد ترەمپی سەرۆکی ئەمریکا چەند سزایەکی ئابووری بەسەر کۆماری ئیسلامیی ئێراندا سەپاندووە و هەڕەشەی لە هەر لایەن و کەسێکیش کردووە، کە هەوڵ بدات ئەو سزایانە بشکێنێ، ئەوا رووبەڕووی سزای ئەمریکا دەبێتەوە.









باسنيوز