لیژنه‌ هاوبه‌شه‌كانی قایمقامیەتی قه‌زای سه‌یدسادق، ده‌ستیان به‌سه‌ر زیاتر له‌ سێ تۆن برنجی خراپبوودا گرتووە كه‌ خاوه‌نه‌كه‌ی ویستوویه‌تی به‌ گۆڕینی فه‌رده‌كانی له‌ بازاڕدا ساغی بكاته‌وه‌.

له‌ ڕاگه‌یاندراوێكی به‌شی راگه‌یاندنی قایمقامیەتی قه‌زای سه‌یدسادق، كه‌ ئه‌مرۆ یه‌كشه‌ممه‌( 5/8/2018) بڵاو كراوه‌ته‌وه‌ ، هاتووه‌: "ئه‌مڕۆ یه‌كشه‌ممه‌ لیژنه‌ هاوبه‌شه‌كانی قایمقامیەتی قه‌زای سه‌یدسادق له‌ ئه‌نجامی گه‌ڕان و پشكنینه‌ به‌رده‌وامه‌كانیدا له‌ناو بازاری سه‌یدسادق و له‌ كۆگایه‌كی هه‌ڵگرتنی خۆراكی جمله‌ فرۆشیدا، ده‌ستیان گرتووە به‌سه‌ر زیاتر له‌ سێ تۆن برنجی خراپبوودا ".

ئەوەش ڕوون كراوه‌ته‌وه‌: "خاوه‌نی ئه‌و كۆگایه‌ ویستوویەتی به ‌گۆڕینی فه‌رده‌ی برنجه‌كان جارێكی‌تر له‌ بازاردا ساغی بكاته‌وه‌ و ئه‌و برنجه‌ بیفرۆشێت به‌ هاووڵاتیان، به‌ڵام ده‌ستی به‌سه‌ردا گیراوە".

له‌ كۆتایی ڕاگه‌یاندراوه‌كه‌دا ئاماژه‌ به‌وه‌ دراوه‌: "كه‌ له‌لایه‌ن لیژنه‌ هاوبه‌شه‌كانی قایمقامیەتی قه‌زای سه‌یدسادقه‌وه‌ سه‌رجه‌می ئه‌و فه‌رده‌ برنجانه‌ له‌ناو براون و كۆگاكه‌ش داخراوه‌ و خاوه‌نه‌كه‌شی به‌ غه‌رامه‌ سزا دراوه‌".










باسنیوز