ئەمڕۆ هاوکات لەگەڵ یادی کارەساتی ئێزدیان، کچێکی دیکەی ئێزدی رزگار کرا.

بەرپرسی نووسینگەی رزگارکردنی کوردانی ئێزدی حسێن قائیدی، بە ماڵپەڕی فەرمیی پارتی دیموکراتی کوردستان گوت: ''ئەمڕۆ کچێکی دیکەی کوردی ئێزدی بە ناوی ''رەهەف سلێمان'' لە تەمەنی ١٢ ساڵیدا کە خەڵکی کۆمەڵگەی تلبەناتی سەر بە قەزای شنگالە لە سووریا ڕزگار کرا.

ئەو دەڵێ، لە رزگارکردنی کوردانی ئێزدی بەردەوام دەبن و هەموو رێگایەک دەگرنەبەر بۆئەوەی تەواوی ئەو کەسانە رزگاربکەن کە تا ئێستا لە دەستی داعشدا ماون. رەهەف سلێمان ئەو کچەی کە ئەمڕۆ ئازاد کرا، چوار ساڵ بەر لە ئێستادا لە رێککەوتی ٣-٨-٢٠١٤ تیرۆریستانی داعش رفاندیان.

لە رۆژێکی وەک ئەمڕۆدا لە ٣ـی ئابی ٢٠١٤، تیرۆریستانی داعش هێرشیان کردە سەر شارۆچکەی شنگال و کۆمەڵکوژیان دژی ئێزدیان ئەنجام دا.
زیاتر لە ٦ هەزار ئێزدیان رفاند و ٣٦٠ هەزار ئاوارەی هەرێمی کوردستان کران و ١٠٠ هەزاریشیان ئاوارەی دەرەوەی وڵات بوون و زیاتر لە هەزار و ٢٠٠ کەسیش کوژران و هەموو مەزارگە و شوێنە ئاینییەکانیش لە ناوبرد و زیاتر لە ٦٠ گۆری بەکۆمەڵیش تا ئێستا دۆزرانەوە.
kdp -