گوندێ مێركێ یێ كریستیانان ب سه‌ر قه‌زا ئامێدیێ ڤه‌ ژ ئه‌گه‌رێ بۆردومانا فرۆكێن تۆركیا ل به‌ر چۆلكرنێ یه‌ و نها هژماره‌كا كێم یا خێزانان تێدا ماینه‌ و ئه‌و ژى كارێ به‌ردانا گوندێ خوه‌ دكه‌ن.

ئه‌ندریوس یۆخه‌نا، ئێك ژ ئاكنجیێن گوندێ مێركێ ب سه‌ر قه‌زا ئامێدیێ ڤه‌، دیار كر، بۆردومانا فرۆكێن توركیا ل ده‌وروبه‌رى گوندێ مه‌ به‌ره‌ڤ زێده‌بوونێ یه‌ و حه‌فتیه‌ك ناچیت ئه‌گه‌ر جاره‌كێ ئاقار و چه‌م و بیستانێن گوندێ مه‌ ژ ئالیێ فرۆكێن وه‌لاتێ توركیا ڤه‌ نه‌هێته‌ بۆردومانكرن و گه‌هشتیه‌ وى ئاستى كو جارنا ل نێزیك خانیێن گوندى ژى بۆردومان بهێته‌ كرن و مه‌ترسیێن مه‌زن ل سه‌ر خه‌لكێ گوندى په‌یدا دكه‌ت.

ئاشكرا ژى كر، بۆردومانا فرۆكێن توركیا خانیێن مه‌ د هه‌ژینن و گه‌له‌ك جاران په‌نجه‌رێن مه‌ دشكێنن و ئه‌ڤه‌ ژى بوویه‌ ئه‌گه‌ر كو گه‌له‌ك جاران ئه‌م ب رۆژ بهێینه‌ سه‌ر گوندێن خوه‌ و ب شه‌ڤ بچینه‌ ناڤ باژێر بژین و گه‌له‌ك خێزانان ژى ب تمامى گوند بجههێلایه‌ و هنده‌ك ژى ل به‌ر هێلانا گوندى نه‌ و گۆت ژی: ب تنێ د ئه‌ڤ ساله‌ دا نێزیكى 10 جاران ئاقارێ گوندێ مه‌ هاتیه‌ بۆردومانكرن.












باسنیوز